BOBONARO, 19 Setembru 2025 – Ministériu Juventude, Desportu, Arte no Kultura (MJDAK), liuhosi Diretór-Jerál Juventude, David Tomás de Deus, ofisiálmente ensera ona Formasaun kona-ba Relasaun Saudavel ba joven sira iha Suku Tapo-Memo, Munisípiu Bobonaro. Serimónia enseramentu ne'e hala'o ho prezensa husi Sekretáriu Autoridade Postu Administrativu Maliana, João da Costa de Fátima.

Serimónia ne'e partisipa mós husi Diretór Ezekutivu Sentru Juventude Maliana, Alcino Lopes, reprezentante Xefe Suku Tapo-Memo, Mário Lopes Hornai, funsionáriu pontu fokál MJDAK, formadór, no joven partisipante sira.

Joven mak Futuru Nasaun nian, Presiza Matenek

Iha ninia intervensaun, Diretór-Jerál David Tomás de Deus hato'o agradesimentu ba formadór sira tanba sira-nia kontribuisaun importante hodi fó matenek krítiku ba joven sira kona-ba relasaun saudavel.

Nia enkoraja joven partisipante sira atu kontinua aprende no sai ema ne'ebé intelektuál, tanba "joven mak futuru nasaun nian."

Diretór-Jerál esplika katak formasaun hanesan ne'e realiza tanba bazeia ba peskiza sira ne'ebé hatudu katak kazu kazamentu sedu, isin-rua sedu, moras HIV/SIDA, no violénsia seksuál sa'e maka'as.

"Atividade ne'e nu'udar esforsu ida husi Governu, liu-husi MJDAK, atu hasa'e joven sira-nia koñesimentu hodi prevene problema sosiál sira ne'e," nia afirma.

Kolaborasaun Forte ho Parseiru Dezenvolvimentu

David Tomás de Deus subliña mós importánsia husi kolaborasaun. Nia hateten katak MJDAK (ne'ebé uluk nu'udar Sekretáriu Estadu Juventude no Desportu - SEJD) servisu hamutuk ho parseiru dezenvolvimentu internasionál sira hanesan UNICEF, UNFPA, no UNDP hodi hala'o formasaun hanesan ne'e.

Objetivu prinsipal husi kolaborasaun ne’e mak atu hanorin joven sira oinsá atu respeita sira-nia an rasik, ema seluk, no mós kultura nasionál.

Iha nia mensajen finál, nia husu ba joven sira atu kontinua aprende no fahe informasaun ne'ebé sira hetan ona ba sira-nia maluk sira seluk hodi evita dalan ne'ebé ladi'ak.

#MídiaMJDAK