DILI, 14 Juilu 2026, GKI—Ministru Juventude, Desportu, Arte no Kultura (MJDAK), Nelyo Isaac Sarmento, hatete, MJDAK atinje kuaze 40% ezekusaun orsamentu  Jeral Estadu 2026, husi Janeiru to'o Jullu. Maibe iha trimestre dahuluk hasoru difikuldade atu adapta ho sistema aprovizionamentu foun ne'ebé Ministériu Finansas implementa.

Nelyo Isaac Sarmento (NIS) hatete,  sistema aprovizionamentu foun ne'ebé Governu implementa liuhusi Ministériu Finansas sai dezafiu ba ekipas finansas MJDAK iha trimestre dahuluk, maibé situasaun ne'e komesa normaliza iha trimestre daruak hafoin pesoál sira simu formasaun.

“Iha trimestre dahuluk ami iha difikuldade atu adapta ho sistema aprovizionamentu foun. Maibé iha trimestre daruak pesoál sira adapta tiha ona tanba hetan formasaun husi Ministériu Finansas,” hatete NIS  ba Jornalista sira, hafoin partesipa iha reuniaun Interministerial  ba planu médiu prazu 2027-2030 iha Centru Covensaun Dili (CCD),  Tersa (14/07).

Nia dehan to'o fulan Jullu, ezekusaun orsamentu MJDAK tuir kalendáriu implementasaun programa atinje ona kuaze 40%, no espera katak iha trimestre datolu bele liu 50%. “To'o agora ezekusaun programa atinje kuaze 40% husi Janeiru to'o Jullu. Ha'u fiar katak iha trimestre datolu bele atinje liu 50%,” dehan nia.

Nelyo esplika,  ezekusaun orsamentu ne'e destina ba programa juventude no desportu, inklui apoiu ba sentru juventude, organizasaun kompetisaun futebol, voleibol, basketbol no jogu komunitáriu.

Nia akresenta,  MJDAK mos kontinua implementa programa infraestrutura ba kampu desportivu, manutensaun fasilidade sira no preparasaun ba ASEAN Games 2027. Maibé, prosesu konstrusaun balun atraza tanba kapasidade kompanhia kontratista sira.

“Iha programa infraestrutura, konstrusaun balun la'o tarde tanba kapasidade husi kompanhia sira, ne'e mos afeita ba ami nia ezekusaun programa,” NIS informa.

Aleinde ne'e, iha tinan 2026 MJDAK prepara atividade nasional rua, mak Festival Desportu Ensinu Superiór no Festival Desportu Nasionál ne'ebé sei involve atleta husi munisípiu hotu. “Ami halo ona koordenasaun ho autoridade munisípiu sira atu prepara atleta sira hodi partisipa iha eventu nasional sira ne'ebé sei realiza iha Dili,” dehan Nelyo.

Enkuantu, tuir aprovasaun Orsamentu Jerál Estadu (OJE) 2026, MJDAK hetan alokasaun US$11.308.436, depois iha alterasaun aumenta ba US$11.858.436 iha debate espesialidade.

Orsamentu ne'e distribui ba Saláriu no vensimentu US$2.360.216, Bens no servisu US$1.537.535, Transferénsia públika US$6.187.995, Kapitál dezenvolvimentu: US$1.222.690. *Media MJDAK*