DILI, 11 Agostu 2026, GKI---Ministru Juventude, Desportu, Arte no Kultura (MJDAK), Nelyo Isaac Sarmento (NIS), konsidera, universidade sira mak sai nain ba Federasaun Desportu Akademia Timor Leste (FDATL). Tanba ne’e, jestor universidade sira mak halo planu ho bele realiza atividades desportu kada tinan  iha nivel munisipiu no nasional.

NIS informa kestaun ne’e, iha enkontru ofisial ho jestor strutura FDATL iha Salaun Magna MJDAK, Lecidere, Dili, Tersa (11/08). Soumutu ne’e,  akompña husi Diretór Jerál Desportu (DJD), David Tomas de Deus ne’e,  diskuti  kona-ba planu realizasaun festival akadémia ba universidade hotu iha Timor-Leste. Parte FDATL nian, Ricardo da Costa Ribeiru nudar Presidenti ho nia estrutura aprezenta planu atu realiza atividades jogus kompetisaun festival akademia desportu entre universidades iha Timor Lorosae laran ba MJDAK.   

“Universidade sira mak sai na’in ba iha federasoens atu nune’e universidade bele hatene oinsá mak bele halo atividade tinan rua dala ida para bele fo oportunidades ba iha autoridade munisipiu sira halo kada tinan atu bele halo selesaun no mós iha Dili kompetisaun kada tinan tenki realiza tanba ministériu iha programa ba ida ne’e oinsá ita atu kolabora depende ba diskusaun tanba governu iha komitimentu atu finansia ba atividade ida ne’e,”  NIS esplika.

Atu dezenvolve desportu iha Timor-Leste, tuir NIS, labele depende de’it ba iha governu maibé oinsá mak kolabora hamutuk ho eskola no universidade sira ne’e importante tebes atu hasa’e mós prestiziu universidade nian tanba hanorin estudante sira la’os de’it siensia maibé mós pratika fizíku nian. #MédiaMjdak