COVALIMA, 8 Outubru 2025 – Iha mehi atu eleva valór kulturál nu'udar identidade nasionál no baze ba dame, Lia Na'in sira husi Munisípiu Covalima realiza ona serimónia rituál tradisionál hodi husu lisensa ba foho boot no rai boot nudar simbulu kbit natureza nian. Atividade ne'e hala'o nu'udar preparasaun esensiál ba eventu istóriku Festival Fronteira Kulturál.

Serimónia ne'e hatudu duni katak Kultura mak sai nu'udar "Matak Malirin" ba komunidade, ne'ebé ho objetivu atu husu bensa no asegura katak eventu ne'e sei la'o ho susesu, dame, no laiha obstákulu.

Prezensa Institusionál no Relevánsia Kulturál

Serimónia ne'e hetan partisipasaun husi Sekretaria Estadu Arte no Kultura (SEAK), Parseiru Administrasaun Munisipál Covalima (PAMC), no Sentru Nasionál Kultura (CNC). Prezensa institusionál ne'e reflete kompromisu Governu nian atu valoriza prátika kulturál no rituál tradisionál nu'udar xave ba kohezaun sosiál.

Kova no Bua-Malus ba Amizade

Nu'udar simbulu ofisiálmente ba simu vizita no hametin relasaun, komunidade Covalima tau ona kova no bua-malus hodi simu delegasaun kulturál husi Munisípiu 12 nian no parseiru transfronteira, liuliu husi Timor Osidentál (NTT) hanesan Malaka, Atambua, no Kefamenanu.

Gestu kulturál ne'e ho objetivu atu fortifika unidade, amizade, no dame entre komunidade sira iha área fronteira, hodi sai nu'udar ezemplu di'ak kona-ba kooperasaun kulturál ho viziñu sira.

Festival Fronteira Kulturál ne'e, ne'ebé akontese ho partisipasaun Lia Na'in sira-nia bensa, promete atu sai nu'udar selebrasaun ida ne'ebé hatudu riku-oin kulturál Timor-Leste nian no hametin ligasaun istóriku ho parseiru rejionál.

#MídiaMJDAK