Díli, 29 Juñu 2026 – Sua Excelénsia Ministru Juventude, Desportu, Arte no Kultura (MJDAK), Nelyo Isaac Sarmento (NIS), ohin loron lidera reuniaun hamutuk ho Komité Olímpiku Nasionál Timor-Leste (CONTL) no Komité Desportu Timor-Leste (CDTL) hodi ko'alia kona-ba preparasaun ba ASIA Games iha Nagoya, Japaun, ba tinan 2026.

Reuniaun ne'e hala'o iha salaun Magna MJDAK, Lecidere, Dili, Timor-Leste, ho partisipasaun husi Prezidente CDTL, Vice Prezidente CONTL, Sekretariu Jeral CONTL, Prezidente hasa’e pezu/powerlifting no membru ekipa CDTL no CONTL.

Iha reuniaun ne'e, mós ko'alia kona-ba kontinjente Timor-Leste ne'ebé sei tuir kampionatu internasionál ASIA Games 2026 iha Nagoya-Japaun, nune'e mós ho Paralimpiku sira-nian.

"Tamba ne'e maka agora dadaun ne'e ita sei ko'alia ho CONTL, CDTL inklui Governu liu husi MJDAK, hodi ko'alia kona-ba ita-nia partisipasaun iha Nagoya ne'e ho kondisaun ne'ebé ita iha, nune'e mós ita hare ba modalidade ne'ebé serve liu atu tuir kompetisaun ASIA Games nian," hateten Ministru Nelyo.

Ministru Nelyo mós subliña katak baze fundamental husi SEA Games Tailândia nian sei sai referénsia, hodi tau hanoin hamutuk atu fó apoiu ba modalidade sira ne'ebé iha vantajen no presiza investimentu.

"Reuniaun ida ne'e mós fó lembra ba ita hotu iha ne'e katak reprezentasaun ne'ebé ba rai liur ne'e reprezenta estadu, laós reprezenta individu an rasik. Tanba ne'e mak presiza kolaborasaun entre Governu ho instituisaun sira. Mai ita hamutuk hodi hatur ideia ne'ebé loos kuandu reprezentasaun atleta ba iha ne'eba ne'e reprezenta nasaun Timor-Leste," dehan nia tan.

Ministru Nelyo mós enfatiza katak Governu mak jestor ba orsamentu hotu-hotu, tanba ne'e Governu hatene kondisaun ne'ebé ita atu ba. Nia mós rekorda katak tinan barak ona ita lakon situasaun ida ne'e, tanba ne'e agora mai ita unidade ba pensamentu no ekipa hodi hanoin diak hodi lori delegasaun sira ba mesmu lakon, maibé fila ho situasaun foun ka unidade foun ba delegasaun sira ne'ebé atu ba partisipa eventu internasionál ASIA Games 2026 iha Nagoya-Japaun.

Rekorda fila fali katak Governu liu husi MJDAK propoin ba modalidade lima ne'ebé atu tuir kampionatu iha Aichi-Nagoya, Japaun, maka modalidade lima hanesan tuir mai ne'e: Atletismu, Boxe, Karate-Do, Taekwondo, no Futebol.

Reuniaun ida-ne'e mós sai pasu importante iha preparasaun atleta no delegasaun Timor-Leste nian atu partisipa ho di'ak iha eventu internasionál boot ida-ne'e, hodi hamutuk ho Governu no instituisaun desportiva sira atu asegura reprezentasaun ne'ebé di'ak ba nasaun.

#MediaMjdak