DILI, 26 MARSU 2026 – Sua Exelénsia Vise-Primeiru-Ministru, Ministru Koordenadór Asuntu Sosiál no Ministru do Dezenvolvimentu Rurál no Abitasaun Komunitária, Eng. Mariano ASSANAMI Sabino, hamutuk ho Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, lidera Diálogu Sosiál ho foin-sa’e sira ne’ebé hala’o iha Salaun Lalini Larigutu CNE, Dili.

Ho tema “Empoderamentu Juventude ho Karakter Forte ba Kontrusaun Paz, Estadu no Nasaun”, diálogu ne’e sai hanesan plataforma estratéjika hodi dignifika foin-sa’e sira nu’udar responsavel prinsipál ba mudansa no kontrusaun nasaun nian iha futuru.

Esperansa no Potensiál Juventude

Iha ninia intervensaun, Vise-PM Assanami Sabino subliña importánsia husi foin-sa’e sira-nia hanoin no dezafiu ne’ebé sira hasoru hodi Governu bele foti kbiit hamutuk. Nia reafirma katak iha istória mundu nian, juventude mak sempre sai fatur determinadór ba mudansa hotu.

"Imi joven sira mak esperansa no potensiál boot ba ita-nia rai. Maske ita hasoru sirkulasaun ne’ebé difisil no dezafius barak, fiar katak imi mak esperansa. Imi tenke asume responsabilidade, hamriik ho imi-nia identidade rasik, hodi sai ajente da pátria ba dame nian," dehan Vise-PM Assanami Sabino.

Kompetisaun iha Nível Regionál no Globál

Vise-PM mós fó hanoin katak Timor-Leste oras ne’e tama ona iha kompetisaun globál liuhusi ASEAN, CPLP, no g7+. Tanba ne’e, joven sira la’ós de’it presiza matenek, maibé tenke iha karakter ne’ebé forte no mentalidade "lutadór" hodi kontinua luta ba dezenvolvimentu nasaun nian.

Nia apela ba foin-sa’e sira atu reforma sira-nia an hodi sai líder ne’ebé di’ak no mantein kompromisu atu konstrui moris iha sosiedade ho mentalidade ne’ebé pozitivu, tanba paz mak valór fundamentál ba moris hamutuk.

Apoiu Estratéjiku MJDAK

Ministru MJDAK, Nelyo Isaac Sarmento, mós akompaña diálogu ne’e nu’udar parte husi esforsu Ministériu nian hodi hametin Kapitál Sosiál tuir mandatu Rezolusaun Governu n.º 43/2024. MJDAK kometidu hodi dudu programa empoderamentu ne’ebé foka ba soft skills no inkluzaun sosiál hodi prepara foin-sa’e sira hasoru dezafiu nasionál.

#MídiaMJDAK