Dili, 2 Dezembru 2025 – Ministériu Juventude, Desportu, Arte no Kultura (MJDAK) simu ona proposta ofisiál husi delegasaun China ASEAN Panorama Group (Grupo CAP) nian atu hametin liután kooperasaun estratéjika entre Timor-Leste no Xina, liuliu iha área juventude, desportu, arte no kultura. Proposta ne'e fó fokus ba oportunidade ne'ebé kriadu husi China-ASEAN Expo (CAEXPO) nian.

MINISTRU AGRADESE NO SUBILÑA TURIZMU

Intervensaun husi Sua Exelénsia Ministru Juventude, Desportu, Arte no Kultura, Nelyo Isaac Sarmento, subliña hodi agradese no fó bemvindu ba Grupo CAP ne'ebé mai aprezenta sira-nia atividade sira.

Ministru Nelyo Isaac Sarmento hatete: “Atividade sira-ne'e [Grupo CAP nian] interessante duni hodi ita investe liuliu iha área ne’ebe mak ha’u lidera hanesan juventude, desportu, arte no kultura. Ami iha diversifikasaun iha mult-ikulturál, hanesan rikusoin ami nian iha tradisaun Timor nian. Ita buka meiu hodi kolia, ami iha área ida importante tebes hanesan turizmu hodi kopera hamutuk hodi fó buat di’ak ba ita-nia komunidade sira.”

ESTABELESE SENTRU KOORDENASAUN OFISIÁL IHA CAEXPO

Fundadór Grupu CA Panorama, Sr. Gao Hang, hateten sira hakarak atu estabelese Sentru Liaison Office ida iha Panorama Group iha Nanning, Guangxi. Nanning, nu'udar sidade ida ne’ebé iha fatin permanente ba CAEXPO, sai nu'udar pontu sentrál ba kooperasaun Xina-ASEAN.

Grupo CAP nu'udar kompañia ne'ebé espesializa iha Ázia nian atu kopera iha área oin-oin hanesan desportu no kultura, no sira hakarak investe tan iha Timor-Leste tanba Timor-Leste mos sai ona membru ASEAN.

Inisiativa ne'e iha objetivu atu kria pontu kontaktu institusionál ida ne'ebé dedika ba fasilitasaun aliñamentu estratéjiku, fahe informasaun, no koordenasaun projetu entre Timor-Leste no Xina.

KOOPERASAUN IHA FILME, TELEVIZAUN NO DRAMA BADAK

Sr. Gao Hang subliña objetivu mai hasoru S.E. MJDAK atu informa no hatene kona-ba kultura Timor-Leste nian hodi bele promove atu sira mai investe. Grupu CA Panorama propoin atu buka oportunidade kolaborasaun iha setór filme, televizaun, no mídia online. Ida-ne’e bele inklui: Planu no produsaun konjunta ba dokumentáriu;Vídeo promosionál; Drama badak ne’ebé hatudu espíritu juventude, desportu, arte no kultura Timor-Leste nian.

Sira fiar katak projetu audiovizuál inovativu sira-ne'e bele hametin kompreensaun entre povu Timor-Leste no Xina.

KONVITE BA FÓRUM INTERNASIONÁL GUANGXI 2026

Grupu CA Panorama mós hato’o konvite ba Sua Exelénsia Ministru MJDAK atu partisipa iha "ASEAN-Oriented Forum on Cultural Exchange and Cooperation" iha Guangxi iha tinan 2026. Fórum ne'e nu’udar plataforma nivel aas ida hodi hala’o interkámbiu kulturál entre Xina no nasaun sira ASEAN nian, ne’ebé hala’o ona sesaun 19 ho susesu.

#MídiaMJDAK