DILI, 17 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa iha serimónia lansamentu primeira-pedra ba projetu melloria Ospitál Nasionál Guido Valadares (HNGV). Projetu ne'e, hetan apoiu finanseiru husi Governu Japaun liuhosi Ajénsia Kooperasaun Internasionál Japaun (JICA), sei harii edifísiu foun ba maternidade. Serimónia ne'e hala'o iha resintu HNGV, Dili.

Kompromisu ba Saúde Nasionál

Serimónia ne'e lansa diretamente husi Sua Exelénsia Primeiru-Ministru, Kay Rala Xanana Gusmão, akompaña husi Vise-Primeiru-Ministru, Eng. Mariano Assanami Sabino, no Ministra Saúde, Sua Exelénsia Elia de Jesus Amaral. Partisipasaun husi membru Governu Konstitusionál sira, inklui Ministru MJDAK, hatudu duni kompromisu Governu Konstitusionál IX nian atu apoia setór importante sira hotu, liuliu saúde, ne'ebé liga ho moris-saudável ba juventude no sidadaun sira.

Projetu ne'e sei konstrui sala obstetrísia no jinikolojia ho enfermaria partu nian iha HNGV. Tuir planu, edifísiu ne'e sei iha kama hamutuk 76 ba inan isin-rua sira, hodi hasa'e kualidade no asesu ba serbisu saúde materna.

Projetu ne'e ho orsamentu totál $20 millaun no estimasaun atu kompletu iha fulan Abríl 2027.

Partisipa mós iha serimónia ne'e mak membru Parlamentu Nasionál, xefe ajénsia ONU, misaun diplomátika, no reprezentante husi JICA, ne'ebé reforsa parseria di'ak entre Timor-Leste no Japaun.

#MídiaMJDAK