DILI, 16 JANEIRU 2026 – Sua Eselénsia Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho Prezidente Komité Olímpiku Nasionál Timor-Leste (COTL), Sr. Afránio Xavier do Amaral, hala'o enkontru avaliasaun jerál ho atleta husi modalidade 14 ne'ebé foin fila husi kompetisaun South East Asian Games (SEA Games) iha Thailandia husi loron 9-20 Dezembru 2025.

Iha biban ne’e, partisipa mós husi Vise-Prezidente COTL I, Sr. Mateus da Cruz, no Vise-Prezidente COTL II, Sr. Vicente de Carvalho, ne'ebé hala'o iha Salaun Uma Nahe Biti Boot, MJDAK.

Agradesimentu no Valorizasaun ba Atleta

Reprezenta Governu Timor-Leste, Ministru Nelyo Isaac Sarmento (NIS) hato'o parabéns ba atleta sira ne’ebé lori ona medalla osan-mutin (perak) no bronze ba rai-dobén. Ministru afirma katak maske seidauk to’o espetativa ba osan-mean, Estadu nafatin valoriza responsabilidade morál ne’ebé atleta sira hatudu ona.

Ministru mós kompromete katak Governu sei fó direitu subsídiu ba atleta sira hotu nudar forma apresiasaun. Pagamentu ne'e sei hala'o hamutuk hafoin hein delegasaun ASEAN Para Games ne'ebé oras ne'e sei kompete hela iha Thailandia.

Preokupasaun: Fatin Treinu ne’ebé Atravessa Malu

Reprezentante Karatedo Timor-Leste, Sr. Antonio de Araujo, hato'o katak sira-nia partisipasaun iha Thailandia la'o di'ak, maibé nia husu atensaun ba Governu no Konfederaun sira ba preparasaun iha futuru.

Nia esplika katak durante ne’e atleta sira hasoru difikuldade ho fatin treinu ne’ebé la naton. Dalaruma, oráriu treinu ba modalidade Karatedo atravessa fali ho modalidade Taekwondo iha fatin ne’ebé hanesan, situasaun ne’ebé prejudika kualidade preparasaun atleta sira-nian.

Difikuldade Transporte ba Atleta Selesionadu

Alende fatin treinu, kestaun transporte sai preokupasaun boot ba atleta sira. Sr. Antonio de Araujo no Reprezentante Taekwondo husi Dojan KONI, Sr. Hendric da Silva, foti proekupasaun hanesan katak dalabarak atleta selesionadu sira labele mai tuir preparasaun ho másimu tanba laiha transporte rasik.

Sr. Hendric haktuir katak durante ne'e mestre sira mak dudu-an hodi fasilita transporte ba sira-nia atleta, maibé ida-ne'e la sustenta ba tempu naruk. Tan ne'e, sira husu ba Governu atu prepara transporte espesiál ida ba atleta sira hodi fasilita sira-nia movimentu ba fatin treinu.

Responsabilidade Morál hodi Promove Nasaun

Hatan ba preokupasaun sira-ne'e, Ministru Nelyo Isaac Sarmento fanu fali atleta no juventude sira katak sira iha responsabilidade morál hodi promove imajen Timor-Leste nian. Governu sei kontinua halo esforsu hodi kria kondisaun di'ak liu ba desportu, inklui mós valorizasaun liuhusi subsídiu hodi motiva vontade treinu atleta sira-nian ba eventu sira ne'ebé sei mai.

Akompaña nafatin ami iha média sosiál Facebook: Ministériu Juventude, Desportu, Arte no Kultura

#MídiaMJDAK