DÍLI, 12 MARSU 2026 – Súa Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho Vise-Ministru Negósiu Estranjeiru no Kooperasaun (MNEK) ba Asuntu ASEAN, lansa ofisialmente programa Futuru Lider ba ASEAN (FLBA) ba dala III. Serimónia lansamentu ne’e hala’o iha Salaun Laline Larigu, CNE, Caicoli, Díli.

Iha nia diskursu, Ministru Nelyo Isaac Sarmento esprime ninia orgullu boot ba partisipasaun foin-sa’e sira-ne’ebé sai hanesan parte estratéjiku husi polítika Governu nian hodi prepara jerasaun foun hasoru dezafiu regionál.

“Ha’u sente orgullu tebes ho imi. Nu’udar Timor-oan, laiha ema seluk ne’ebé sei dezenvolve ita-nia rain, só imi-nia liman rasik mak bele. Tempu agora la’ós ona atu ita hein de’it iha kotuk, maibé joven sira tenke hamriik iha oin hodi fó solusaun ba problema nasaun nian,” dehan Ministru MJDAK.

Sua Exelénsia subliña mós katak adezaun Timor-Leste ba ASEAN la’ós de’it atu sai membru, maibé atu kontribui ho kbiit no kapasidade ne’ebé foin-sa’e sira iha. Nia fó hanoin katak se jerasaun tuan sira bele lori nasaun ne’e ba independénsia ho vizaun ne’ebé do’ok, jerasaun foun sira ne’ebé matenek liu tenke lori nasaun ne’e ba prosperidade.

Programa FLBA ba dala III ne’e foka ba área kaba-balun (krusiál) hanesan Empreendedorizmu, Teknolojia Informasaun (TI), Saúde, Edukasaun, Ekonomia, Kultura, Polítika, Seguransa no Defeza. Ministru Nelyo Isaac apela ba joven sira atu aproveita oportunidade ida-ne’e hodi loke hanoin, aprende husi nasaun membru ASEAN seluk, no prepara an ba merkadu traballu regionál.

“Aprende buat di’ak husi li’ur, identifika dezafiu mundu nian, no fila mai ho vizaun ne’ebé kmanek hodi lori Timor-Leste ba dalan dezenvolvimentu. Ita preparadu ona atu hasoru dezafiu boot iha rejiaun ne’e,” tenik nia.

Lansamentu ne’e hetan partisipasaun másimu husi kargu diplomátiku (Embaixadór sira), reprezentante MNEK, sosiedade sivíl, no foin-sa’e sira ne’ebé sai kandidatu ba futuru lideransa nian.

#MídiaMJDAK