GLENO, 22 Agostu 2025 – Ministériu Juventude, Desportu, Arte no Kultura (MJDAK), liuhosi Diresaun Nasionál Patrimóniu, Loístika no Infraestrutura (DNPLI), hala'o inspesaun finál ba projetu rehabilitasaun Estádiu Kafe Ermera. Projetu ne'e ezekuta husi kompañia Heipari.

Inspesaun ne'e nu'udar pasu esensiál hodi halo verifikasaun faktu (fact check) ba relatóriu kompañia nian ne'ebé deklara katak servisu atinji ona 100%.

Verifikasaun 100% no Kuantidade

Inspesaun ne'e lidera husi tékniku sira ne'ebé espesializadu husi MJDAK, hanesan Sr. António Ximenes, Sr. Nívio da Costa, no Sr. Horácio da C. Ximenes. Sira akompaña husi enjeñeiru na'in-rua (2) husi Kompañia Heipari, tékniku, no Pontu Fokál MJDAK iha Munisípiu Ermera.

Tuir tékniku MJDAK, Sr. António Ximenes, objetivu inspesaun nian mak atu halo klarifikasaun no verifikasaun diretamente:

"Ami mai atu klarifika no verifika diretamente servisu ne'ebé sira halo. Ami koko atu hatene se servisu ne'e kompleta duni ka la'e, no oinsá ligasaun ho dadus ne'ebé iha Livru Kuantidade (BoQ). Ida-ne'e atu bele halo prosesu pagamentu ba kompañia," Sr. António Ximenes dehan.

Kualidade Tuir Kontratu

Sr. António Ximenes mós subliña katak rezultadu inspesaun preliminar hatudu katak servisu ne'ebé kompañia halo tuir duni BoQ ne'ebé define ona. Nia mós realsa katak fasilidade sira, hanesan sistema iluminaun (lampu) no buat seluk, monta tuir planu ne'ebé iha.

Inspesaun rigorozu ne'e hatudu kompromisu Governu nian, liuhosi MJDAK, atu halo jestaun ba infraestrutura públika ho transparánsia no hodi garante katak osan Estadu nian uza ho efisiente hodi lori benefísiu ba komunidade desportiva Ermera nian.

#MídiaMJDAK