Díli, 02 Marsu 2026 — Ministru Juventude, Desportu, Arte no Kultura, S.E. Nelyo Isaac Sarmento, lidera reuniaun ho estrutura Liga Futebol Timor-Leste (LFTL) hodi husu atu hahú lalais kompetisaun Liga Primeira Divizaun no Segunda Divizaun iha inísiu fulan Abril 2026.

Reuniaun ne’e hala’o ho prezensa Diretór Jerál Desportu, João M. Rodrigues, Diretór Nasionál, Oscar Dias Quintas, Xefi Departamentu Josefina Zeca Pinto, staf sira husi área desportu, no estrutura kompleta LFTL ne’ebé lidera husi Prezidente Ipolito Soares.

Iha reuniaun ne’e, Ministru Nelyo Isaac Sarmento subliña importánsia atu liga futbol nasional hahú lalais, tanba kompetisaun Tasa Liga foin mak remata. Governu konsidera katak kontinuidade atividade desportiva importante atu halo atleta sira nafatin iha kondisaun kompetitiva, hadia abilidade téknika no prepara sira ba kompetisaun internasional iha futuru.

Ministru mós husu LFTL atu reforsa koordenasaun ho Federação de Futebol de Timor-Leste (FFTL), liuliu kona-ba preparasaun infraestrutura no aspetu tékniku sira. Governu, liu husi MJDAK, afirma prontu atu fó apoiu máximu ba dezenvolvimentu desportu iha país tomak, inklui preparasaun ba epóka desportiva 2026.

Iha sorin seluk, Prezidente LFTL, Ipolito Soares, agradese ba oportunidade atu hasoru malu ho Ministru hodi diskute preparasaun liga epóka 2026. Nia hatete katak LFTL prontu ona atu realiza kompetisaun ho partisipasaun klubu 10 iha Primeira Divizaun no 10 klubu iha Segunda Divizaun.

Tuir planu, kompetisaun sei hala’o tuir padraun internasionál husi FIFA no Asian Football Confederation (AFC), ho sistema “home no away” durante fulan lima to’o neen. LFTL mós planeia atu enkaixa kompetisaun Tasa 12 Novembru iha kalendáriu epóka ida ne’e.

Inisiativa ne’e espera bele revitaliza kompetisaun futbol nasional no promove dezenvolvimentu atleta sira iha Timor-Leste.

#MídiaMJDAK