DILI, 15 Setembru 2025 — Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa iha sesaun solenál ba abertura Sesaun Lejislativa da-tolu husi Lejislatura da-neen nian, ne'ebé hala'o iha Parlamentu Nasionál.

Sesaun ne'e hahú ho serimónia ofisiál ne'ebé prezide husi Prezidente Parlamentu Nasionál, Maria Fernanda Lay, no partisipa mós husi Primeiru-Ministru Interinu, Francisco Kalbuadi Lay, no membru Governu sira seluk, deputadu, Prezidente Tribunál Rekursu, embaixadór, no konvidadu honradu sira.

Mensajen husi Prezidente Repúblika

Iha ninia diskursu, Prezidente Repúblika, Dr. José Ramos Horta, apela ba unidade nasionál no dezenvolvimentu sustentável. Prezidente Horta hateten, "abertura ba sesaun lejislativa solenál ida-ne'e hola parte iha tinan ida ne'ebé sei marka ita-nia memória nasionál, maibé, liu-liu, ne'ebé dezafia ita-nia futuru nu'udar nasaun."

Nia subliña katak atu fó onra ba sakrifísiu husi eroi sira ne'ebé fó sira-nia vida ba liberdade, "ita tenke hatene oinsá atu transforma ita-nia independénsia nasionál ba dezenvolvimentu sustentável bazeia ba oportunidade hanesan no justisa sosiál ba sidadaun timoroan hotu-hotu."

Prezidente Horta mós fó apelu ba unidade nasionál, diálogu konstrutivu, no serbisu hamutuk hodi harii Timor-Leste ne'ebé prosperu, justu, no solidáriu.

Sesaun ne'e hahú ho ezekusaun hinu nasionál no minutu ida hakmatek hodi fó onra ba eroi nasionál sira.

#MídiaMJDAK