DILI, 14 Jullu 2025 — Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho Sekretáriu Estadu Arte no Kultura (SEAK), Jorge Soares Cristovão, kontinua observa ensaiu dansa kolosál hodi prepara ba serimónia abertura XII Jogos Desportivos CPLP 2025 iha Estádio Munisipál Dili.

Fokus ba Kualidade no Transmisaun Direta

Iha observasaun ne'e, Ministru Sarmento fó hanoin ba treinadór dansa kolosál, Mito Freitas, atu halo preparasaun ho didi'ak, hodi la bele hamosu dúvida ruma ba estudante sira ne'ebé sei halo aprezentasaun iha loron abertura nian.

Ministru mós fó orientasaun ba ekipa RTTL, E.P., ne'ebé sei halo transmisaun direta ba eventu ne'e. RTTL, E.P. promete ona atu monta kamera 12 iha estádiu durante serimónia abertura no jogu futeból sira.

Serimónia abertura ne'e sei hahú ho serimónia hasa'e bandeira nasionál ne'ebé sei akompaña ho hinu nasionál "Pátria-Pátria," ne'ebé sei toka husi banda militár F-FDTL.

Voluntáriu Prontu ona

Ekipa voluntáriu sira ne'ebé simu ona formasaun durante loron tolu iha salaun MSSI, Caicoli, komesa ona koopera ho ekipa husi Ministériu Negósiu Estranjeiru no Kooperasaun (MNEC) hodi kontribui ba susesu eventu boot ne'e.

Iha observasaun ne'e, Ministru no Sekretáriu Estadu hetan akompañamentu husi Xefe Gabinete MJDAK no SEAK, Diretór-Jerál Desportu, Diretór-Jerál SEAK, Prezidente KRAM, Diretór Nasionál Desportu Komunitária, Diretór Nasionál Patrimóniu Kultura Kontemporánea, no reprezentante F-FDTL.

#MídiaMJDAK