DILI, 18 MARSU 2026  – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha Sorumutu Konsellu Ministrus (KM) ne’ebé hala’o iha Palásiu Governu, Dili, kuarta-feira ne’e. Sorumutu ne’e foka liu ba analiza kestaun justisa, kooperasaun rejionál ASEAN, no preparasaun ba eventu internasionál CPLP.

Iha sorumutu ne'e, Konsellu Ministrus analiza ho kle'an konkluzaun ba auditoria forense ne’ebé hala’o husi kompañia internasionál EY Portugal (Ernst & Young). Auditoria ne'e foka ba prosesu akizisaun no jestaun ba aviaun Twin Otter no konstrusaun ró Haksolok ne’ebé uluk jere husi Autoridade RAEOA.

Governu simu deskrisaun detalladu kona-ba irregularidade no konkluzaun prinsipál sira husi prosesu akizisaun ne'e, nu’udar pasu ida hodi asegura transparénsia no boa-governasaun iha jestaun patrimóniu Estadu nian.

Alende ne’e, Vise-Ministra ba Asuntus ASEAN aprezenta kalendáriu reuniaun sira ne’ebé Timor-Leste sei partisipa iha fulan-marsu no abríl tinan 2026. Partisipasaun ne’e estratéjiku tebes hodi hametin parseria iha mekanizmu koordenasaun polítika, ekonómika, no seguransa iha kualidade Timor-Leste nian nu’udar membru foun iha família boot rejionál ne'e.

Iha setór edukasaun, tuir proposta husi Ministra Edukasaun, Dulce de Jesus Soares, Konsellu Ministrus delibera ona hodi aprova tema: “Edukasaun, valór demokrátiku sira no partisipasaun sívika: dalan sira atu hametin sosiedades CPLP”.

Tema ne'e sei sai baze ba Reuniaun Ministrus Edukasaun CPLP ne’ebé sei hala’o iha Dili, loron 7 fulan-maiu tinan 2026. Sorumutu ne’e importante tebes ba Timor-Leste hodi lidera konsertasaun polítika entre Estadu-Membru lian portugés nian iha setór edukasaun.

Partisipasaun Ministru Nelyo Isaac Sarmento iha sorumutu KM ne'e hatudu kompromisu MJDAK nian hodi kontribui ba dezenvolvimentu nasionál liuhusi desizaun kolektiva ne’ebé estratéjiku no transparente.

#MídiaMJDAK