COVALIMA, 11 Outubru 2025 – Iha jogu finál ne'ebé nakonu ho intensaun iha Kampu Futebol Salele, Postu Administrativu Tilomar, ekipa Bobonaru konsolida sira-nia pozisaun iha futeból rejionál hodi manán títulu Fronteira Cup 2025. Ekipa Bobonaru konsege hatudu sira-nia forsa másimu hodi manán ekipa uma-na'in Covalima D ho eskor finál 3-1, hodi sai Kampiaun ba dala rua tuir-tuir malu.

Jogu ne'e hala'o ho asaun ne'ebé intensa tebes, hodi hatudu duni espíritu kompetitivu husi munisípiu fronteira nian.

Mensajen Forte husi Kapitaun Kampiaun

Hafoin manán títulu, Kapitaun Bobonaru, Pedro Paulo Vicente, espresa ninia kontente, maibé fó hanoin importante ida kona-ba mentalidade desportiva ba atleta sira:

"Ita lahatene situasaun iha rai laran ne'e, dala ruma ita ba Dili, ita bele kompete tan. Importante mentalidade di'ak... jogador tenke fuan boot, labele ulun mak boot," Pedro Paulo hatete.

Nia subliña katak fuan-boot no espíritu fair play mak nu'udar baze ba susesu iha kompetisaun desportiva.

Dezafiu ba Kualidade Infraestrutura no Organizasaun

Pedro Paulo mós hato'o krítika konstrutivu ba Komisaun Organizadora no Governu, hodi tau atensaun ba asuntu rua ne'ebé importante ba futuru eventu nian: Kualidade Organizasaun: Nia husu atu hadi'a di'ak liu tan kualidade organizasaun ba tinan oin. Karater Rejionál: Nia husu atu tau atensaun ba Fronteira Cup nu'udar eventu rejionál semi-profisionál. Ida-ne'e importante tebes atu eleva kualidade eventu nian ba futuru, liuliu wainhira ekipa husi Indonézia (hanesan Atambua, Belu, Malaka, Kupang, Kefa, no Soe) mai kompete.

Apelu Covalima nian ba Governu

Husi parte ekipa lakon, Kapitaun Covalima D, Baltazar Xavier Rompas, husu ba Governu atu tau matan ba Kampu Futebol sira.

"Ami rekomenda ba Governu atu nune'e bele tau matan ba kampu futeból sira hodi asegura kondisaun di'ak ba treinamentu no kompetisaun," Baltazar husu.

MJDAK agradese ba Bobonaru ba sira-nia vitória istóriku no ba Covalima D ba sira-nia luta ne'ebé makas. Kompromisu Governu nian mak atu hamutuk ho komunidade no atleta sira hodi dezenvolve desportu nasionál liuhusi diálogu no melloria kontínua.

#MídiaMJDAK