Lautem, 24 Novembru 2025 – Ministériu Juventude, Desportu, Arte no Kultura (MJDAC) liuhusi Diretora Jerál Serbisu Kooperativu (DJSK), Sra. Izabel Adalziza,akompaña husi Diretór DNPLI, Abel de Jesus Andrade ohin loron halo enkontru ho Prezidente Autoridade Munisípiu (PAM) Lautem hodi koordena prosesu atribuisaun rai ba konstrusaun Estadiu Munisipál Lautem. Atividade ne'e hala’o iha Sala Gabinete PAM, Fuiloro.

Diretór Nasionál Patrimóniu, Lojístika no Infraestrutura (DNPLI), Abel de Jesus Andrade, subliña katak objetivu boot husi enkontru ne’e mak atu finaliza atribuisaun rai ho medida 15 hektares ba MJDAC hodi harii Estadiu Munisipál iha Lautem.

Abel de Jesus Andrade (DNPLI): "Ami mai ho Karta Ofisiál hodi husu ba PAM Lautem atu halo despaxu ba Terras Propriedade (Direksaun Nasionál Terras no Propriedade) hodi atribui rai estadu ne’e ba MJDAC. Ida-ne'e atu kontinua prosesu ba estudu no dezeñu (DID/QAR) ba Estadiu Munisipál tolu (3) iha Lautem, Covalima, no Manufahi, ne'ebé Covalima ho Manufahi remata ona levantamentu dadus."

DNPLI afirma katak iha informasaun Terras Propriedade halo ona levantamentu dadus ba rai ne’e, maibé seidauk atribui formalmente ba MJDAC. Enkontru ohin ne’e nu’udar follow up atu garante katak prosesu atribuisaun ne'e bele la'o lalais hodi permite MJDAC kontinua ba prosesu QAR ba ADN no prepara ba DID.

Sekretáriu Autoridade Munisípiu Lautem, Sr. Francisco dos Santos (reprezenta PAM), hatete katak Autoridade Munisípiu Lautem apoia totalmente programa IX Governu nian ne’e, liuliu programa boot MJDAC nian ne’ebé tama ona iha Planu Programátiku ba tinan 2026 nian.

Francisco dos Santos (Sekretáriu PAM): "Iha tinan rua ba kotuk, ami halo ona levantamentu dadus, maibé seidauk iha rezultadu. Ami sei koordena ho Terras Propriedade hodi atribui lalais rai ne’e ba MJDAC. Ami apela mós ba komunidade sira ne’ebé okupa rai estadu atu kolabora ho Governu atu halo dezenvolvimentu hodi harii Estadiu Munisipál."

Enkontru ne'e nu'udar pasu krítiku hodi garante Estadiu Munisipál Lautem bele sai realidade, hodi dezenvolve desportu iha Munisípiu Lautem.

#MídiaMJDAK