DILI, 29 Outubru 2025 – Ministériu Juventude, Desportu, Arte no Kultura (MJDAK), liuhusi Diresaun Nasionál Dezenvolvimentu Juventude (DNDJ), ohin hala'o faze avaliasaun finál ba Proposta Programa Empoderamentu Juventude Inovativu-Mudansa (PEJI-M).

Ekipa Júri MJDAK nian, kompostu husi membru na’in-3, hahú halo avaliasaun detallada ba aprezentasaun husi organizasaun juventude ne'ebé liu ona faze inisiál. Atividade ne'e realiza iha Sala Magna MJDAK, Lecidere, Dili.

Prosesu Seletivu Rigorozu

Diretór Nasionál Dezenvolvimentu Juventude, Sr. Firmino Dias Quinta, esplika prosesu seletivu rigorozu ne'ebé hala'o tiha ona: Total Proposta Submete: 52. Liu Seleksaun Administrasaun: 41. Liu Seleksaun Faze Daruak (Hodi Halo Prezenta): 11. Alokasaun Final: 8 organizasaun sei pasa atu hetan orsamentu $2,500.

"Ba kolega sira-ne'ebé ohin marka prezensa iha ne'e, ami husu atu aprezenta asuntu tolu (3) importante: atividade detaillu, kalendarizasaun, no orsamentu nia mekanizmu implementasaun programa," dehan Sr. Firmino Dias Quinta.

Kompromisu no Deadline OGE 2025

Sr. Firmino Dias Quinta realsa katak programa PEJI-M ne'e hetan finansiamentu mai husi Orsamentu Jerál Estadu (OGE 2025) liuhusi kategoria Transferénsia Públika (TP). Tanba ne'e, iha deadline (limitasaun tempu) ne'ebé labele liu: Finalizasaun Implementasaun: Organizasaun hotu tenke realiza hotu atividade iha fulan Dezembru 2025 nia laran. Submete Relatóriu Finál: Relatóriu hotu tenke submete iha loron 31 Dezembru 2025, hodi bele halo enkaixa fali ba Sistema Jestaun Finanseira Governu nian, SIPMARE.

Rezultadu finál husi avaliasaun ne'e sei publika iha pajina ofisiál Facebook MJDAK nian, no fundu apoiu sei entrega iha loron 12 Novembru 2025 iha Munisípiu Aileu.

MJDAK kontinua komprometidu atu utiliza fundu Estadu nian ho transparénsia no efisiénsia, hodi apoia inisiativa inovativu sira husi juventude nasionál.

#MídiaMJDAK