LAUTEM, 24 Outubru 2026, GKI--Prezidente Repúblika Timor Leste, José Ramos-Horta  hateten,  rekonsiliasaun entre Estadu Timor-Leste no Indonézia sai ona ezemplu di’ak ba mundu tanba hatudu  dame, amizade no kooperasaun bele harii hikas relasaun entre nasaun rua maski iha istória ne’ebé nakonu ho dezafiu.

“Rekonsiliasaun Indonesia ho Timoroan sai modelu ida iha mundu. Ita lalika inventa tan problemas. Modelu iha mundu no ema  hotu hakfodak,”  PR  RDTL, José Ramos-Horta informa kestaun rekonsiliasaun ne’e, hafoin loke  Diálogu Rekonsiliasaun iha programa Festival Fronteira 2026, ne’ebé hala’o iha Com Munisipio Lautem.

PR Horta hatutan,  embaixadór sira ne’ebé hela iha Díli, inklui reprezentante husi nasaun Europa, manifesta admirasaun ba prosesu rekonsiliasaun entre Timor-Leste no Indonézia  relasaun di’ak ne’ebé nasaun rua harii durante  ne’e sai ezemplu importante kona-ba oinsá dame no komprensaun bele supera ferida husi pasadu.

PR rekunese, timoroan besik rihun sanulu  mak estuda iha Indonézia, inklui iha nivel mestradu no doutoramentu (PhD). Tanba ne’e, tuir PR,  relasaun entre estudante timoroan no sosiedade Indonézia hatudu oportunidade hodi hametin amizade, solidariedade no kooperasaun entre jerasaun foun husi nasaun rua.

Prezensa sidadaun Indonéziu iha Timor-Leste, PR hatutan, mós la sai obstákulu ba relasaun di’ak ho povu Timoroan. Situasaun ne’e, tuir PR  hatutdu, povu husi nasaun rua bele moris hamutuk ho dame, respeitu malu no harmonia.

Iha parte seluk, Prezidente Horta apela ba ema sira ne’ebé seidauk konsege halo rekonsiliasaun, tantu iha Indonézia ka iha Timor-Leste, atu buka dalan ba dame liu husi buka apoiu husi autoridade relijioza, inklui amu bispu, atu fasilita diálogu, perdáun no rekonsiliasaun.

Iha hanesan, Sekretariu Estadu Arte no Kultura,  Jorge Soares Cristovao  hato'o agradesimento ba Prezidente Republika Timor Leste ho laran kaman tebes bele hakat mai iha Suku Com, hodi akompana atividades  Festival Fronteira 2026 nian. 

Jorge informa,  atividade festival ne'e partisipa husi autoridade Propinsia Nusa Tenggara Timur (NTT) nian no  reprezentante  husi Provinsi Maluku Barat Daya, Indonesia.

Iha mos reprezentasaun Nia Maun Alin Timor oan Sira husi Nusa Tenggara Timur hamutuk ho joventude Sira no mos joven husi G7+ joven husi teritorio Timor laran tomak reprezenta husi konsellu Juventude husi Munisipio Mai hamutuk hare ba futuru Timor ne'e Ita Nia maske ho identidade ne'ebe diferente entermos Kultura atu hasae lisan iha Timor Leste.

Atividades Festival Fronteira 2026 ho tema Interkambiu Kultural ba hametin rekonsiliasaun no  sub-tematiku Hau Nia Tasi Hau Nia Rai no Hau Nia Kultura.

 #MediaMjdaK#