DILI, 14 Abríl 2026 – Ministériu Juventude, Desportu, Arte no Kultura (MJDAK), liuhusi Diresaun Nasionál Desportu Federadu (DNDF), hala’o sorumutu ho Federasaun Nasionál Baskeból Timor-Leste (FNBTL) no Orgánu Liga Baskeból Timor-Leste, Tersa-feira ne’e. Enkontru ne’ebé hala’o iha Salaun Magna MJDAK, Lecidere, foku ba preparasaun administrativu no submisaun proposta ba ezekusaun Liga Nasionál Baskeból époka 2026 ne’ebé planeia sei hahú iha fulan-Maiu oin mai.

Estrutura no Administrasaun ba Liga 2026

Xefe Departamentu Kompetisaun no Selesaun Nasionál, Josefina Zeca Pinto, esplika katak enkontru ne’e nu’udar pasu fundamentál hafoin Sua Eskelénsia Ministru JDAK emite Karta Despaxu ba estrutura Orgánu Liga nian. "Ita presiza halo briefing ba estrutura ne’ebé iha ona, liu-liu kona-ba prosedimentu submisaun proposta no kestaun administrasaun nian, nune’e ita bele minimiza risku no garante liga ne’e la’o ho susesu," tenik Josefina.

MJDAK fó apoiu finanseiru hamutuk $400,000 (Rihun Atus Haat dólar) hodi kobre formasaun Treinador no arbrito inklui atividade liga nian, ne’ebé planeia sei hala’o husi fulan-Maiu to’o Dezembru 2026.

Orgánu Liga nu’udar Ezekutór Independente

Iha fatin hanesan, Prezidente FNBTL, Joaquim José Gusmão dos Reis, relata katak preparasaun ne’e nu’udar resposta ba orientasaun husi Ministru Juventude,Desportu, Arte no Kultura iha loron 16 Marsu liubá. Atu aselera prosesu kompetisaun, FNBTL harii Orgánu Liga Baskeból ne’ebé separadu husi federasaun hodi foku de’it ba ezekusaun liga, enkuantu federasaun sei hala’o knaar supervizaun.

"Kompozisaun Orgánu Liga ne’e hetan ona aprovasaun ofisiál husi Ministru JDAK liuhusi despaxu. Ohin ita koordena hodi aselera proposta orsamentál nune’e bele implementa ona iha tempu badak," dehan Joaquim.

Klubu 12 Sei Kompete

Liga Nasionál Baskeból 2026 sei involve partisipasaun husi klubu hamutuk 12, ne’ebé kompostu husi kategoria feto no mane. Kompetisaun ne’e sai hanesan eventu desportivu ne’ebé públiku hein ona hodi dezenvolve talentu foin-sa’e sira iha modalidade baskeból iha Timor-Leste.

Sorumutu ne’e lidera husi Diretu Nasionál Desportu Federadu, Oscar Dias Quintas, no partisipa husi membru estrutura Orgánu Liga nian no fonsionáriu relevante husi MJDAK.

#MídiaMJDAK