Dili, 10 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, akompañadu husi Diretór Jerál Desportu (DJD), João M. Rodrigues, hasoru malu ho delegasaun Taekwondo Dozan Koni Timor-Leste. Enkontru ne'e halo tuir ekipa ne'e nia partisipasaun no susesu boot iha kampionatu internasionál ida iha Jakarta, Indonézia.

Atividade ne’e hala’o iha Salaun Magna MJDAK, Lecidere, Dili, hodi selebra rezultadu ne'ebé di'ak tebes husi atleta timoroan sira.

Susesu Atleta no Agradesimentu ba Apoiu Governu

Tuir responsavel Taekwondo Dozan Koni Timor-Leste, Oscar Lucio, objetivu husi hasoru malu ne'e mak atu hato'o agradesimentu boot ba MJDAK nia apoiu tomak ba ekipa nasionál. Ekipa ne'e lori atleta na'in-siam (9) ba kampionatu ne'e no fila ho rezultadu istóriku:

··       Medalla Osan Mean: 7

·       Medalla Osan Mutin: 1

·       Total Medalla: 8Medalla: 8

Liután ne'e, atleta timoroan ida mós konsege hetan títulu nu'udar "Mellór Jogadór" tanba hatudu jogu ne'ebé tékniku no fair play tebes.

"Ami agradese tebes ba Exelénsia Ministru nia apoiu. Rezultadu ne'e hatudu katak Timor-Leste iha poténsia boot. Ami prontu atu sai 'fini' ba iha futuru, hodi kontinua treinu maka'as atu hasa'e bandeira nasionál," Oscar Lucio afirma.

Komitmentu Governu ba Desportu Prioritáriu

Iha parte MJDAK, Sua Exelénsia Ministru Nelyo Isaac Sarmento hatete katak susesu ne'e reflete Governu nia komitimentu forte atu fó apoiu ba modalidade sira ne'ebé konsidera nu'udar prioridade nasionál.

"Governu sempre iha komitmentu hodi fó apoiu ba modalidade sira ne'ebé bele lori nasaun nia naran ba mundu internasionál. Espera katak ho prestasaun ida ne'e, Taekwondo Koni la bele baruk. Presiza nafatin kontinua hatudu prestasaun di’ak liutan no konsisténsia iha treinu," Ministru dehan.

Ministru mós husu ba atleta sira atu nafatin konsentradu iha treinu hodi kontribui no sai erói foun ba nasaun, nu'udar ezemplu ba jerasaun foun.

Delegasaun ne'e partisipa iha atividade ne'e kompostu husi atleta Taekwondo Dozan Koni Timor-Leste, porta-vós, no treinadór sira.

#MídiaMJDAK