DILI, 22 Setembru 2025 — Ministru Juventude, Desportu, Arte no Kultura (MJDAK), Nelyo Isaac Sarmento, ohin simu vizita husi Federasaun Taekwondo Timor-Leste hodi diskute preparasaun ba atleta sira nian atu partisipa iha eventu SEA Games iha Tailándia.

Reuniaun ne'e lidera husi Ministru Nelyo Isaac Sarmento (NIS), no hetan akompañamentu husi Xefe Gabinete MJDAK, Egas Barros Guteres Godinho, Diretór-Jerál Desportu, João M. Rodrigues, no reprezentante husi Federasaun Taekwondo, Mr. Kim no ninia ekipa.

Fokus ba Mentalidade no Medalla

Iha ninia intervensaun, Ministru Nelyo Isaac husu ba federasaun atu halo preparasaun másimu. Nia hateten katak partisipasaun iha SEA Games la'ós de'it atu tuir kompetisaun, maibé tenke ho konsisténsia atu bele oferese medalla ba nasaun.

Ministru mós husu ba federasaun no ekipa téknika sira atu, se bele, halo preparasaun iha Koréia antes ba tuir eventu SEA Games iha Tailándia.

Vontade no Disiplina

Ministru NIS subliña katak atleta sira tenke iha vontade no konsisténsia boot, tanba sira sei lori bandeira RDTL nian. Nia enkoraja atleta sira atu iha mentalidade ne'ebé di'ak, la'ós atu emosaun lalais, tanba ida-ne'e bele hatudu frakeza ba adversáriu sira.

"Ha'u fiar imi (taekwondo) bele oferese medalla ida ka rua mai ita-nia rai doben Timor-Leste," dehan Ministru Nelyo.

#MídiaMJDAK