DILI, 22 Jullu 2025 – Iha momentu inspiradór ida ohin iha Lecidere, Sua Exelénsia Prezidente Repúblika, José Ramos-Horta, marka prezensa hodi asiste diretamente jogu kompetisaun Voleibol Praia iha ámbitu XII Jogos Desportivos CPLP 2025. Prezidente Repúblika fó apoiu másimu ba atleta Timor-Leste nian no atleta husi nasaun maun-alin sira seluk.

Prezidente Ramos-Horta nia prezensa, ne’ebé akompaña hosi Ministru Juventude, Desportu, Arte no Kultura (MJDAK), Nelyo Isaac Sarmento, hatudu ninia kompromisu maka’as ba dezenvolvimentu desportu iha Timor-Leste.

Korajen husi Xefe Estadu

Prezidente Repúblika oferese liafuan korajen no enkorajamentu ba jogadór sira atu kontinua luta, hatudu sira-nia espíritu desportivu, no lori onra ba Timor-Leste.

Hafoin ne'e, Ministru Nelyo Isaac Sarmento espresa ninia gratidaun boot ba Prezidente nia apoiu ne'ebé sempre fó forsa moral ba atleta sira.

Povu nia antuziasmu mós boot tebes ho Prezidente nia prezensa iha Lecidere. Ida ne'e reflete esperansa no fiar boot ne'ebé nasaun iha ba futuru desportu nian ne'ebé furak liu iha Timor-Leste.

Viva Desportu Timor-Leste!

#MídiaMJDAK