DÍLI, 30 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, akompaña husi Sekretáriu Estadu Arte no Kultura (SEAK), Jorge Soares Cristovão, ohin partisipa iha Workshop importante kona-ba Planeamentu Senáriu Avaliasaun PED 2011–2030 no Fórmulasaun Planu Prazu Médium (PTM) 2026–2036.

Atividade ne'e, ne'ebé ho importánsia estratéjika nasionál, hala'o iha Salaun JL Word Dili, no hahú hametin aliñamentu vizaun entre Ministériu sira.

Lideransa MPIE: Planu Estratéjiku ba Futuru

Workshop ne'e hetan abertura husi Sua Exelénsia Ministru Planeamentu Investimentu no Estratéjiku (MPIE), Gastão de Sousa, hamutuk ho membru Governu Konstitusionál IX.

Ministru Gastão de Sousa hatete katak aprezentasaun ne'e atu fó rezumu kona-ba rezultadu inisiál avaliasaun Planu Estratéjiku Dezenvolvimentu (PED) nian no hodi introdúz abordajen estrutura ne'ebé sei gia preparasaun Planu Prazu Médium (PTM) 2026–2036.

"Ohin ita diskute asuntu importante sira hanesan, diversifikasaun ekonomia, infraestruturas, no kapitál sosiál. Aprezentasaun ne'e sei ajuda ita hahú diskusaun estratejia liután kona-ba oinsá atu aliña ita-nia prioridades, reforsa kordenasaun, no identifika diresaun polítika ne'ebé ambisiozu maibé viável," dehan Ministru Gastão de Sousa.

Kontribuisaun MJDAK iha Kapitál Sosiál

Ministru Nelyo Isaac Sarmento no SEAK, Jorge Soares Cristovão, nia partisipasaun realsa kontribuisaun MJDAK nian kona-ba pilar Kapitál Sosiál. Kontribuisaun ne’e sei foka ba dezenvolvimentu juventude, promosaun desportu, no preservasaun arte no kultura, atu garante PTM 2026–2036 reflete perspetiva dezenvolvimentu husi setór oioin.

Ministru MPIE argumenta katak prosesu planu estratéjia dezenvolvimentu ne'e sei susesu wainhira reflete perspetiva no kompromisu husi Ministériu hotu-hotu iha Governu Konstitusionál IX.

#MídiaMJDAK