Díli, 23 Fevereiru 2026 — Ministru Juventude, Desportu, Arte no Kultura, Exelensia Nelyo Isaac Sarmento, partisipa iha 1ª Reunião do Conselho Nacional de Organização da Presidência da ASEAN (ACNOC) ne’ebé realiza iha Ministério das Finanças, Díli. Reunião ne’e ho objetivu prepara no koordena preparasaun nasional ba Presidénsia ASEAN ne’ebé Timor-Leste sei asumi iha futuru.

Reunião lidera husi Sua Exelensia Primeiru Ministru Kay Rala Xanana Gusmão no envolve membru Governu no instituisaun relevante sira. Diskusaun foka ba progresu organizasaun nasional, inklui estrutura subkomité sira, infraestrutura, rekursu umanu, seguransa, TIC no preparasaun orsamentu.

Partisipante sira mos simu atualizasaun kona-ba instrumentu jurídiku ne’ebé publika ona iha Jornal da República kona-ba estabelesimentu ACNOC no Termu de Referénsia ba setór no subkomité sira ne’ebé sei responsabiliza ba preparasaun.

Aleinde ne’e, reuniaun diskute mos Roteiru Nasional Implementasaun Kompromisu Pilar Ekonomia ASEAN (AEC) 2026–2030, modelu matriz pozisaun nasional ba reuniaun ASEAN sira, no prioridade sira ba Presidénsia.

Partisipasaun husi Exelensia Nelyo Isaac Sarmento importante atu garante setór juventude, desportu, arte no kultura integra iha preparasaun nasional. Presidénsia ASEAN konsidera hanesan oportunidade atu promove juventude no kultura Timor-Leste iha nivel rejional no internasionál.

Reunião taka ho diskursu husi lideransa Governu ne’ebé enfatiza kolaborasaun interministerial atu asegura preparasaun ne’ebé di’ak, efisiente no koordinadu.

#MídiaMJDAK