DILI, 03 JUÑU 2026 – Ministériu Juventude, Desportu, Arte no Kultura (MJDAK), liuhusi Direção Geral Servisu Korporativu (DGSC) ne'ebé lidera husi Diretor Geral Servisu Korporativu, João Dos Santos, realiza reuniaun ho Ministériu Koordenadór Asuntus Sosiais (MKAS) ne'ebé lidera husi Arcanjelu Leite hanesan koordenador MKAS. Reuniaun ne'e hala'o iha MJDAK, Lecidere, Dili, ho objetivu atu fó informasaun kona-ba ezekusaun planu asaun annual husi Q1 to'o Q2, no mós planu ba futuru.

DGSC João Dos Santos hatete katak MJDAK fahe planu sira ne'ebé planeia atu halo agora, planu ba tinan oin, no aprezenta mós planu médiu prazu husi tinan 2027-2030, ne'ebé abranje área juventude, desportu, arte no kultura. Informasaun ne'ebé MKAS hetan ohin sei atualiza ba Vice Primeiru Ministru II, liuliu ba asuntu sosial, hodi aprezenta fali ba reuniaun Konsellu Ministru.

Iha área arte no kultura, SEAK enfrenta difikuldade kona-ba rai atu harii múzeu. Rai ne'ebé VIII Governu indika ona la bele uza, tanba ne'e SEAK sei identifika fali rai alternativu hodi bele harii múzeu ne'e.

MJDAK mós iha akordu inter-organiku administrativu ho Ministériu Administrasaun Estatal (MAE) atu transfere atividade balun ba munisípiu sira. Maske akordu tiha ona, transferénsia seidauk realiza tanba tinan ida ne'e MJDAK mak finansa atividade desportu komunitaria. Ba tinan 2027, MJDAK tenke diskute ho MAE atu bele entrega atividade esportiva, liuliu ba fasilidade desportu iha munisípiu sira.

Liu husi MKAS, MJDAK mós atu reuniaun fali ho Ministériu Edukasaun (ME) hodi ko'alia kona-ba desportu eskolar. Desportu eskolar iha ME nia okos, entaun ME bele tau fasilidade desportu iha eskola sira, kria jogu amizade entre klase, depois kordena ho MJDAK atu realiza desportu eskolar refere.

Além ne'e, MKAS bele informa ME atu rekruta profesór desportu. Iha Timor-Leste seidauk iha lisensiatura edukasaun fízika no desportu, foin mak diploma III ne'ebé iha UNTL. Reuniaun ne'e sujere ba MKAS atu informa ME atu servisu ho UNTL hodi rekruta baixarelatu sira husi departamentu edukasaun fízika no desportu UNTL nian.

MJDAK no MKAS kontinua hametin koordenasaun interministeriál hodi garante implementasaun programa ne'ebé efisiente no fó benefísiu ba juventude, desportu, arte no kultura iha Timor-Leste.

#MediaMjdak