DÍLI, 23 Marsu 2026 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, partisipa iha serimónia lansamentu Relatóriu Banco Central de Timor-Leste tinan 2025 no diálogu entre Governu ho setór privadu, ne’ebé hala’o iha Centro de Convenções de Díli.

Serimónia ne’e ofisialmente lansa husi Sua Exelénsia Primeiru-Ministru, Kay Rala Xanana Gusmão, akompaña husi II Vise-Primeiru Ministru no Ministru Koordenadór ba Asuntu Ekonomiku, no lideransa relevante seluk, inklui I Vice-PM no Ministru Turizmu no Ambiente, Francisco Kalbuadi Lay, Governadór BCTL, Elder Lopes, no Prezidente Câmara de Comércio e Indústria de Timor-Leste, Jorge M.A. Serrano.

Iha okaziaun ne’e, lideransa Governu no reprezentante setór privadu halo diálogu konstrutivu kona-ba progresu no dezafiu ekonomiku iha Timor-Leste, inklui esforsu atu promove kresimentu ekonomiku sustentavel no kria oportunidade investimentu liuhusi setór privadu.

Relatóriu BCTL nian sai hanesan instrumentu importante atu apoia formulasaun polítika públika, ho objetivu atu lori Timor-Leste ba estatutu nasaun rendimentu mediu-ás tuir orientasaun Planu Estratéjiku Dezenvolvimentu Nasionál.

Iha serimónia ne’e mós, Prezidente CCI-TL entrega ofisialmente Planu Estratéjiku 2022–2032 ba Governu liuhusi Primeiru-Ministru, Vise-Primeiru Ministru sira no Governadór BCTL.

Atividade ne’e hetan partisipasaun boot husi membru Governu, deputadu sira, korpu diplomátiku, no reprezentante setór privadu, tantu husi nivel nasionál no munisípiu sira.

Ho partisipasaun iha eventu ida-ne’e, MJDAK reafirma ninia kompromisu atu apoia dezenvolvimentu ekonomiku inkluzivu, liuliu liuhusi empoderamentu juventude iha setór produtivu.

#MídiaMJDAK