DILI, 22 Abríl 2026 (GCI/MJDAK) – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa iha sorumutu Konsellu Ministru (KM) ne’ebé hala’o iha Palásiu Governu, Dili, kuarta-feira ne’e. Iha sorumutu ne’e, Governu aprova deliberasaun importante ne’ebé kobre área finansas, administrasaun estatál, no transportes.

Rejime Dívida Públika no Sustentabilidade Finanseira

Konsellu Ministru aprova projetu Proposta Lei ba alterasaun dahuluk ba Lei n. 13/2011 kona-ba Rejime Dívida Públika, ne’ebé aprezenta husi Ministra Finansas, Santina Cardoso. Alterasaun ne’e habelar ámbitu emisaun dívida públika nian hodi la limita de’it ba infraestrutura estratéjika, maibé permite mós uza instrumentu hanesan Títulu Tezoru hodi finansia despeza jerál Estadu nian.

Inisiativa ne’e iha objetivu hodi hametin sustentabilidade orsamentál no prepara nasaun ba diminuisaun progresiva reseita husi Fundu Mina-rai, hodi garante estabilidade iha finansiamentu polítika públika sira.

Omenajen ba Saudozu Ministru José Honório

KM aprova mós Rezolusaun Governu ida ne’ebé hato’o triste ne’ebé kle’an ba falesimentu Ministru Ensinu Superiór, Siénsia no Kultura, José Honório da Costa Pereira Jerónimo. Governu rekoñese públikamente ninia dedikasaun, kompeténsia téknika, no espíritu servisu públiku ne’ebé aas hodi dezenvolve sistema ensinu superiór iha Timor-Leste.

Liuhusi Rezolusaun ne’e, determina mós atu hala’o minutu silénsiu ida iha instituisaun públika hotu-hotu no iha ensinu superiór, iha data ne’ebé sei fixa ba oin, nu’udar sinál respeitu ba maktoban.

Nomeasaun ba Estrutura Foun RAEOA

Iha setór Administrasaun Estatál, KM aprova projetu Rezolusaun ne’ebé aprezenta husi Ministru Tomás Cabral ba ezonerasaun no nomeasaun dirijente foun sira iha Rejiaun Administrativa Espesiál Oekusi Ambenu (RAEOA).

Liuhusi deliberasaun ne’e, Governu nomeia Régio da Cruz nu’udar Prezidente RAEOA, hamutuk ho Sekretáriu Rejionál foun na’in tolu (3): Salvador da Cruz (Administrasaun no Finansas), Francisco Loca (Planeamentu no Dezenvolvimentu), no Merita Marques Lafo (Asuntu Sosiál no Organizasaun Komunitária). Alende ne’e, nomeia mós Diretór Servisu Rejionál na’in 21 ne’ebé sei sujeita ba avaliasaun dezempeñu anuál.

Regulamentasaun Taxa Rodoviária

Ikusliu, KM aprova projetu Dekretu-Lei ne’ebé aprezenta husi Ministru Transportes no Komunikasoins, Miguel Manetelu, hodi estabelese taxa foun ba servisu sira relasiona ho veíkulu motorizadu no kondutór. Diploma ne’e klarifika rejime taxa ba matríkula, inspesaun veíkulu, no emisaun lisensa sira, ho objetivu hodi garante korrespondénsia entre servisu ne’ebé presta no ninia kustu. Dekretu-Lei ne’e sei tama iha vigór loron 30 hafoin publikasaun iha Jornál Repúblika.