DILI, 01 Setembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, asume  papél hanesan Inspetór-Jerál ba serimónia rutina Isar Bandeira Nasionál, ne'ebé hala'o iha loron dahuluk fulan Setembru nian iha resintu Ministériu nian.

Iha ninia diskursu, Ministru Nelyo Isaac Sarmento hato'o apelu ida ba funsionáriu sira hotu, hahú husi kargu xefia to'o funsionáriu permanente no kazuál, atu hatudu disiplina másimu ba formatura sira.

Omenajen ba Erói no Kumpri Regra

Ministru Nelyo Isaac Sarmento subliña katak serimónia Isar Bandeira Nasionál nu'udar momentu ida atu fó omenajen ba erói sira ne'ebé hato'o sira-nia moris ba pátria, hodi lori Timor-Leste sai nasaun ida ne'ebé independénte no livre.

Atu garante ambiente servisu ne'ebé organizadu no respeitável, Ministru mós husu ba funsionáriu hotu atu kumpri regra sira ne'ebé orienta husi Diresaun Nasionál Rekursu Umanu.

Serimónia ne'e hetan partisipasaun másiva husi Kargu Xefia sira husi MJDAK, Sekretaria Estadu Arte no Kultura (SEAK), no Komisaun Reguladór Arte Marsiais (KRAM).

#MídiaMJDAK