DILI, 05 Outubru 2026, GKI—Antes estabelese prosesu selesaun ba membrus Parlamentu Foinsae Nian (PFN)  ba period 2027-2029, Ministeriu Juventude Desportu Arte no Kultura, liu husi Diresaun Jeral Juventude halao perparasaun ho atividades workshop loron rua (5-6/10), ba funsionariu MJDAK nain 56 MJDAK no membru Alumni Parlamentu Foinsae Timor Leste (APFTL) nain 66, inklui Sentru Juventude Munisipiu 13.

Funsionariu Publiku MJDAK nain 56 ne’e, durante ne’e, kolokadu serbisu iha munisipiu 14, inklui Atauro.  No membrus APFTL 66 ne’e, nudar parseiru implementador programa PFN  nian.

Materia Workshop loron rua ne’e,   lansamentu nasional no  divulgasaun dokumentus ba funsionariu pontu fokal MJDAK,  representante  Sentru Juventude 13  no  membrus  APFTL 66 iha munisipiu no postu  hodi halao  prosesu sosializasaun no selesaun ba membrus PFN foun ba periodu 2027-2029 nian.  

Ministru Juventude Desportu Arte no Kultura, Nelyo Isaac Sarmento iha abertura workshop, Segunda (05/10), hateten, envolvimentu funsionariu MJDAK no membrus APFTL iha workshop ne’e nudar perparasaun oinsa realiza atividades sosializasaun no selesaun ba membrus PFN foun iha nivel sukus, postus no munisipais hotu.

“Parlamentu Foinsa’e ita tama ona ba iha epoka da-neen signifika MJDAK  produs no forma  ona joven lubuk  tanba ne’e ba membru foun Parlamentu Foinsa’e Nian ne’ebé ita rekruta ne’e,  bele ajuda dezenvolve sira nia suku liu husi ekipa konsellu suku sira iha nivel hotu. Governu sempre fo oportunidade ba reprezentasaun husi joven sira oinsá atu konstrui an hodi tama ba iha vida politíka liu husi atividade sira hodi forma imi nia an atu sai lideransa ne’ebé di’ak iha futuru,”  Nelyo Isaac esperansa.

Nelyo Isaac mós bolu atensaun ba iha funsionariu pontu fokál MJDAK iha Munisipiu no Postu hodi serbisu hamutuk ho Sentru Juventude sira atu oinsá mak bele kolabora ho parseiru dezenvolvimentu sira. Tanba aleindé programa PFN, MJDAL iha programa  emprendedorizmu ba foinsa’e sira atu bele halo mudansa ba iha papel Sentru Juventude sira nian iha area formasaun no kapasitasaun atu liga ho alvu politíka governu nian liu-liu iha ekonomia.  Programa  emprendedorizmu ne’e, hodi  hadi’ak ekonomia familia liu husi formasaun  hasa’e kuñesimentu foinsa’e sira nian atu bele kompete iha merkadu traballu.

Atividades prosesu selesaun membrus PFN foun ne’e hetan apoiu finanseiru husi parseiru dezenvolvimentu UNICEF.  

Partisipa iha abertura workshop ne’e, parseiru dezenvolvimentus  hanesan Gabineti Apoiu Sosiedade Sivil, UNFPA, Sentru Juventude 13 Munisipiu no estrutura funsional MJDAK nian. Workshop ne’e halao iha Salaun Uma Nahe Biti Boot, Lecidere, Dili, Timor Leste.  #MediaMjdak#