JAPAUN, 25 JANEIRU 2026 – Delegasaun joven na'in neen (6) hamutuk ho Lider Ekipa Nasionál (NL) na'in ida, foin  remata sira-nia jornada aprendizajen iha kampaña Ship for Southeast Asian and Japanese Youth Program (SSEAYP) ba dala 49 iha Japaun.

Hafoin loron 11 tuir atividade oioin, delegasaun Timor-Leste nian sei kontinua viajen hodi uza ró-ahi husi Japaun ba Singapura iha loron 26 Janeiru 2026.

Kobertura iha Sidade Oioin

Durante iha Japaun, partisipante sira partisipa iha Japan Local Program ne'ebé fahe ba Grupu Diskusaun (SG Group). Partisipante sira-nia knaar fahe tuir prefetura (sidade) ne'ebé la hanesan hodi hatene liután dezenvolvimentu lokál nian:

·       Chiba: Joven na'in rua (2) hala'o atividade iha ne'ebá.

·       Nagasaki: Na'in ida (1).

·       Tokoshima: Na'in ida (1).

·       Iwate: Na'in ida (1).

·       Toyama: Joven na'in ida (1) hamutuk ho Lider Nasionál.

Diskusaun Temátika no Vizita Estudu

Programa ne'e foka mós ba dezenvolvimentu koñesimentu liuhusi tópiku estratéjiku sira. Partisipante sira tuir vizita estudu ba instituisaun referénsia sira iha Japaun:

1.    Edukasaun ho Kualidade: Vizita ba Universidade Tsukuba hodi fahe hanoin ho estudante sekundária sira.

2.    Kresimentu Ekonómiku no Turizmu: Observa servisu Divizaun Turizmu iha Sidade Kamakura no empreza públiku sira.

3.    Ambiente no Mudansa Klimátika: Vizita ba Tokyo Metropolitan Environmental Public Corporation.

4.    Redusaun Risku Dezastre: Estuda sistema foun iha Metropolitan Area Outer Underground Discharge Channel.

5.    Bem-estár Sosiál no Inkluzaun: Koñese servisu Social Welfare Corporation “Kotoen”.

6.    Sosiedade Dijitál no AI: Vizita ba SAP hodi aprende oinsá teknolojia Artificial Intelligence (AI) ajuda empreza sira jere negósiu ho efisiénsia no produtividade aas.

Visita Kortezia ba Lideransa Japaun

Iha biban ne'ebé hanesan, Líder Joven na'in rua (Youth Leader no Assistant Youth Leader) hamutuk ho Líder Ekipa Nasionál, hala'o vizita kortezia ba Primeiru-Ministru Japaun no Prinsesa husi Família Imperiál Japaun. Enkontru ne'e hodi hametin relasaun amizade no diplomásia entre foin-sa'e sira iha rejiaun Sudeste Aziátiku no Japaun.

Partisipasaun Timor-Leste nian iha SSEAYP nudar pasu importante hodi hari'i lideransa foin-sa'e sira nian. Ho orgullu, sira hi'it-aas Bandeira Nasionál nudar símbolu katak juventude Timor-Leste prontu ona hodi kontribui ba dezenvolvimentu iha futuru.

#MídiaMJDAK