MANATUTO, (GCI-MJDAK) — Sentru Juventude Munisípiu Manatuto, liuhusi parseria ho Ministériu Juventude, Desportu, Arte no Kultura (MJDAK), graduadu foin-sa’e na’in 83 iha área teknolojia no lian hodi responde ba dezafiu dezempregu no asesu ba merkadu traballu internasionál.

Programa kapasitasaun ne’ebé kobre trimestres tolu iha tinan ne’e, foka liuliu ba preparasaun foin-sa’e sira atu kompete iha kategoria tolu: lian Koreia (na’in 37), lian Inglés (na’in 26), no kursu komputadór Microsoft Office (na’in 20).

Jestór Sentru Juventude Manatuto, Jorge Jerónimo Soares, hateten katak formasaun lian Koreia sai hanesan prioridade ida tanba relasiona ho ezame EPS-TOPIK ne’ebé sei hala’o iha fulan hirak oin mai. Ezame ne’e mak rekerimentu prinsipál ba foin-sa’e sira ne’ebé hakarak servisu iha Repúblika Koreia.

"Ami-nia knaar mak atu guia no dirije sira. Liuhusi formasaun hirak ne’e, foin-sa’e sira iha oportunidade boot liu atu kompete iha merkadu traballu rai-laran no rai-liur," Soares dehan iha serimónia entrega sertifikadu iha Manatuto, sesta foin lalais ne’e.

Maske hasoru dezafiu lojístika no infraestrutura, Soares haktuir katak espíritu husi manorin-na’in sira nafatin aas hodi fahe koñesimentu ba feto na’in 27 no mane na’in 56 ne’ebé partisipa iha kursu hirak ne’e.

Diretór Ezekutivu SEPFOPE Munisípiu Manatuto, António Gomes M. D. da Silva Braz, subliña importánsia husi kordenasaun inter-institusionál ne’ebé eziste. Nia dehan katak SEPFOPE labele servisu mesak hodi dezenvolve rekursu umanu munisípiu nian.

"Tempu agora foin-sa’e sira tenke halo kompetisaun liuhusi formasaun oioin hodi bele kompete iha nível nasionál no internasionál," tenik Gomes.

Aleinde prepara foin-sa’e ba rai-liur, Sentru Juventude mós kontinua oferese kursu komputadór ba estudante sira iha Manatuto nu’udar baze fundamentál hodi apoiu sira-nia aprendizajen iha eskola no prepara sira ba mundu servisu iha futuru.

Serimónia ne’e konta mós ho partisipasaun husi Pontu Vogal MJDAK Munisípiu Manatuto, reprezentante husi Postu Administrativu Manatuto, no autoridade lokál sira.