DÍLI, 8 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin akompaña Xefe Kaza Sivíl Prezidénsia Repúblika, Sra. Jesuína Maria Ferreira Gomes, iha abertura primeira reuniaun preparasaun ba Maratona Internasionál Dili 2025. Reuniaun ne'e hala'o iha Palásiu Prezidente, Ai-Tarak Laran, Dili.

Tema Sentrál: "Run for Palestine" no Páz Internasionál

Ministru Nelyo Isaac Sarmento hatete katak Maratona tinan ne'e sei la'o ho tema: "Run for Palestine". Nia subliña importánsia husi tema ne'e ba komunidade internasionál:

"Tema tinan ne'e mak 'Run for Palestine'. La’ós asuntu polítiku, maibé hanesan hato’o ita-nia solidariedade no promove páz internasionál. Ida-ne’e mós oportunidade atu hatudu potensialidade Timor-Leste no promove turizmu."

Kategoria no Data Kompetisaun

Maratona Internasionál Dili 2025 sei hala'o iha loron 11 Outubru 2025, ho kategoria tolu (3) atu enkoraja partisipasaun másima husi atleta no públiku tomak:

1. Maratona Kompletu: 42.195 km
2. Meia Maratona: 21.098 km (ba nível profisionál)
3. Halai ba Páz: 3 km (ba joven, labarik, no família)

Eventu boot ida-ne'e organiza husi Prezidénsia Repúblika, MJDAK, Federasaun Atletízmu Timor-Leste, ho suporta forte husi instituisaun governu no parseiru sira hotu. Koordenasaun ho Prezidénsia Repúblika nian realsa papél desportu nian nu'udar instrumentu ba diplomásia públika no solidariedade.

#MídiaMJDAK