DILI, 12 JANEIRU 2026  – Ministru Juventude, Desportu, Arte no Kultura (MJDAK), Sua Ekselénsia Nelyo Isaac Sarmento, hamutuk ho Sekretáriu Estadu Arte no Kultura (SEAK), Sua Ekselénsia Jorge Soares Cristóvão, lidera reuniaun primeiru Konsellu Diretores iha tinan 2026, ne’ebé hala’o iha Salaun Magna MJDAK, Lecidere, Dili, Segunda-feira ne’e.

Reuniaun ne’e mós partisipa husi Diretór-Jerál sira, kargu xefia, no tékniku sira husi MJDAK no SEAK, ho objetivu prinsipál atu avalia dezempeñu tinan kotuk nian no kria mekanizmu ne’ebé efisiente liu ba ezekusaun programa iha tinan 2026.

Iha abertura, Ministru Nelyo Isaac Sarmento (NIS) emfatiza katak inísiu tinan nian mak tempu ne’ebé krítiku hodi halo auto-avaliasaun ba dezafiu sira ne’ebé hasoru ona.

“Iha reuniaun primeiru Konsellu Diretores nian iha tinan 2026 ne’e, ita hakarak hatene loloos difikuldade sira ne’ebé ita hasoru durante tinan ida nian, hanesan kestaun rekursu, liña orientasaun, no kordenasaun sira seluk. Ita presiza buka mekanizmu ne’ebé di’ak hodi mellora ita-nia servisu hodi nune’e tinan 2026 bele la'o ho kualidade di'ak liután,” dehan Ministru Nelyo Isaac.

Prioridade Ezekusaun Semestrál

Ministru mós fó hanoin ba kargu xefia sira hotu atu organiza planu atividade sira ho rigorozu, liuliu hodi define prioridade ba primeiru no segundu trimestre nian. Ida-ne’e importante tebes hodi asegura katak atividade sira ne’ebé planeadu ona bele realiza tuir kalendáriu no la akumula de’it iha fin do anu.

Iha reuniaun ne’e, membru Konsellu Diretores sira mós halo diskusaun kle’an kona-ba alokasaun Orsamentu Jerál Estadu (OGE) 2026 nian, hodi garante katak rekursu finanseiru sira ne’ebé limitadu bele kobre nesesidade prioritária iha setór Juventude, Desportu, Arte no Kultura.

Sekretáriu Estadu Arte no Kultura, Jorge Soares Cristóvão, iha biban ne’e mós fó nia kontribunisaun hodi hametin kordenasaun entre diresaun sira hodi dudu identidade kulturál no kreatividade nasionál ba oin iha tinan foun ne’e.

Reuniaun ne’e konklui ho kompromisu ida husi kargu xefia sira hotu hodi aumenta kualidade serbisu administrasaun no ezekusaun fíziku ba programa sira ne’ebé benefisia diretu ba komunidade.

#MídiaMJDAK