BOBONARO, 28 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa ativamente iha atividade Jornada Nasionál Juventude (JNJ) 2025, ne'ebé hala'o iha Resintu Parókia Bobonaro, Suku Malilait, Munisípiu Bobonaro Vila.

Ministru Nelyo Isaac Sarmento akompaña husi Xefe Gabinete MJDAK, Sr. Egas Barros Guterres Godinho, no mós hetan prezensa husi Pe. Francisco Indra do Nascimento Tey Sera no Pe. Cirilio dos Santos Maya.

Partisipasaun Ativa Juventude nu'udar Xave ba Dame

Iha ninia diskursu, Ministru Nelyo Isaac Sarmento (NIS) apela ba foinsa'e Bobonaro atu partisipa ativu hodi kontribui ba paz no estabilidade iha sosiedade no komunidade nia laran. Nia esplika katak partisipasaun ativa husi juventude mak esensiál atu promove dame:

"Oinsá ita juventude sira bele partisipa ativu hodi kontribui no hakiak dame no kria paz iha komunidade no sosiedade nia laran tanba, iha komunidade ita sei hasoru dezafiu boot ne'ebé dala ruma ita rasik mak kria," Ministru Nelyo afirma.

Diálogu, Desportu, no Arte nu'udar Instrumentu ba Paz

Ministru NIS mós hatutan katak MJDAK nia polítika nu'udar inisiativa xave ida atu fó oportunidade ba joven sira iha Timor laran tomak atu partisipa iha diálogu no interkámbiu kulturál sira, hanesan eventu JNJ ne'e. Nia realsa katak eventu hanesan ne'e bele kria diálogu efetivu.

Atu harii dame no paz ne'ebé sustentável, Ministru Nelyo Isaac Sarmento reforsa katak buat ne'e bele hetan liuhusi:

1. Diplomasia Desportiva
2. Espresaun Artístika-Kulturál

Jornada Nasionál Juventude 2025 ne'e halibur hamutuk sarani no peregrinu hamutuk na'in 400 (atus haat), ho kada parókia reprezenta ema na'in-haat (4), inklui sarani no inan-aman husi Parókia Bobonaro.

Partisipasaun MJDAK nian ne'e hatudu kompromisu Governu nian atu investe iha kapasitasaun sosio-kulturál ba juventude nu'udar ajente ba dame no dezenvolvimentu nasionál.

#MídiaMJDAK