DÍLI, 14 JANEIRU 2026 (MÍDIA MJDAK) – Ekipa dirijente husi Ministériu Juventude, Desportu, Arte no Kultura (MJDAK), hamutuk ho Ajénsia Kooperasaun Internasionál Koreia (KOIKA), hala’o enkontru koordenasaun hodi fiksa preparasaun ba serimónia inaugurasaun Sentru Desportu Amizade Koreiano-Timorense, ne’ebé lokaliza iha Becora.

Enkontru ne’ebé hala’o iha Salaun Ema ho Defisiénsia MJDAK nian, dader ne’e, lidera husi Diretora-Jerál Servisu Korporativu, Sra. Izabel Adalsiza Fátima R. Ferreira, hamutuk ho Diretu-Jerál Desportu, Sr. João Rodrigues.

Parte KOIKA Timor-Leste nian reprezenta husi Vise-Diretór, Sr. Sunghwan Jang, Vise-Diretora, Sra. Suji Lee, no Koordenadór Programa, Sr. Marcos da Costa Dias. Partisipa mós iha enkontru ne’e Diretór Nasionál Patrimóniu no Lojístika (DNPL) MJDAK, Sr. Abel de Jesus Andrade.

Objetivu husi sorumutu ne’e mak atu identifika no fiksa lista konvidadu sira, ne’ebé sei inklui membru IX Governu Konstitusionál husi liña ministeriál oioin, membru Parlamentu Nasionál, no parseiru dezenvolvimentu sira. Informasaun husi parte KOIKA nian katak, delegasaun na’in haat (4) husi Repúblika Koreia mós sei mai partisipa direta iha serimónia inaugurasaun ne’ebé sei mai.

Sentru Desportu Amizade Koreia-Timor iha Becora ne'e sai hanesan símbolu hametin relasaun bilaterál entre nasaun rua, liuliu iha kampaña dezenvolvimentu talentu foin-sa’e sira nian iha área desportu.

Enkontru ne’e remata ho susesu no parte rua kometidu hodi asegura serimónia inaugurasaun sei la’o ho dignu no organizadu.