DILI, 15 Maiu 2026 – Ministériu Juventude, Desportu, Arte no Kultura (MJDAK) kontinua fo apoiu no dudu progresu desportu nasionál, liuliu iha kategoria alta kompetisaun, hodi hametin kualidade atleta sira no prepara sira ba eventu rejional no internasionál.

Xefe Departamentu Alta Kompetisaun MJDAK, Sr. Nelson Smith Lay, ne'ebé reprezenta Diretora Desportu Federadu, foin lalais ne'e marka prezensa iha Kampionatu Nasionál Atletizmu ne'ebé organiza husi Federasaun Atletizmu Timor-Leste (FATL), hodi kondekora medalla ba atleta manán-na'in sira.

Kompetisaun ne'ebé hala'o iha Estádiu Munisipál Díli ne'e, sai hanesan odamatan importante ida hodi sukat no hametin kualidade foin-sa'e sira nian, liuliu iha modalidade halai-taru (kurrida) no saltu kumpridu. Aktividade ne'e mós parte husi esforsu MJDAK atu identifika talentu foun no dezenvolve kapasidade atleta sira iha nível nasionál.

Iha oportunidade ne'e, MJDAK hato'o parabéns ba atleta hotu ne'ebé kompete ho espíritu desportivizmu aas no dedikasaun boot. Sr. Nelson Smith Lay enkoraja atleta sira atu kontinua treinu bebeik no hadi'a prestasaun, hodi bele hasa'e naran Timor-Leste iha palku desportivu internasionál.

MJDAK reafirma kompromisu atu kontinua apoiu ba federasaun sira no atleta sira, liu husi programa estratejiku no orsamentu ne'ebé adekuadu, hodi garante dezenvolvimentu sustentável ba setór desportu nasionál no kria jerasaun atleta ne'ebé kompetitivu.

#MediaMjdak