COVALIMA, 4 Outubru 2025 – Prezidente Autoridade Munisípiu Covalima (PAMC), Sua Exelénsia Miguel Armada Cardoso, realiza ona reuniaun ikus hodi finaliza preparasaun ba eventu boot rua: Fronteira Cup 2025 no Festival Kulturál Fronteira nian. Reuniaun ne’e hala’o iha Salaun Munisipál Covalima, hamutuk ho ekipa husi Ministériu Juventude, Desportu, Arte no Kultura (MJDAK), Sekretariadu Estadu Arte no Kultura (SEAK), no Centru Nasionál Chega! (CNC).

Desportu Komunitáriu Inklui Modalidade Neen

PAMC, Miguel Armada Cardoso, hateten katak programa desportu komunitáriu ne’e liga Munisípiu tolu (3) ne’ebé baliza ho Indonézia, hanesan RAEOA, Bobonaru, no Covalima rasik.

Fronteira Cup 2025 sei inklui modalidade neen (6) mak hanesan:

1. Futebol
2. Voleibola
3. Basketball
4. Futsal (Feto)
5. Corrida Cavalhu
6. Atletizmu

Komisaun sira fahe ona ba kada seksaun no hein atu implementa planu ne'e. Ekipa sira identifika ona fatin atu hala’o desportu, hodi uza Kampu Futebol Salele nian ba jogu futebol.

Tuir Termu Referénsia husi MJDAK, kada Munisípiu sei reprezenta husi atleta hamutuk 60 pesoas(Bobonaru 60, RAEOA 60, no Covalima 60). Covalima, nu’udar uma-na’in dahuluk iha tinan 2025, la taka dalan ba atleta sira ne'ebé rejistu ona iha Postu Administrativu no Munisípiu.

Festival Kulturál no Diálogu Ho NTT

Festival Kulturál Fronteira nian ne'ebé lidera hosi SEAK sei hatudu aprezentasaun kulturál hosi Munisípiu Covalima, Bobonaru, no RAEOA, inklui mós parte husi Indonézia (NTT) hanesan Rejiaun Kafemenanu, Malaka, no Belu. Partisipasaun sira-ne’e konfirmadu ona.

CNC mós sei organiza diálogu importante ida entre joven Timor-oan ho joven Timor-oan ne'ebé uluk iha tinan 1999 integra ho Indonézia. Diálogu ne’e sei envolve joven hamutuk 50 hosi Covalima, Bobonaru, no RAEOA, no mós joven rezisténsia no sobrevivente sira, inklui joven 50 husi NTT.

Partisipa iha reuniaun ne’e mak Xefe Departamentu Desportu Para Todos, José Monteiro, Xefe Departamentu Relasaun Públika no Protokolu, Diretór Nasionál Kultura, Reprezentante CNC, PNTL, no F-FDTL.