DILI, 22 Abríl 2026 (GCI/MJDAK) – Ministériu Juventude, Desportu, Arte no Kultura (MJDAK), liuhusi Diresaun Nasionál Asosiativizmu Juventude (DNAJ), foin lalais ne’e hala’o konferénsia imprensa hodi fó sai implementasaun programa Estudu Vizita ba membru Parlamentu Foinsa’e (PFN) ba tinan 2026. Atividade ne’e hala’o iha Salaun Uma Nahe Biti Boot MJDAK, Lecidere, Dili.

Diretór DNAJ, Mário Tilman, esplika katak programa ne’e nu’udar afirmasaun husi Governu hodi dezenvolve kapasidade juventude ne’ebé konsagra ona iha Polítika Nasionál Juventude (PNJ) no bazeia ba Rezolusaun Governu n. 23/2009 ne’ebé hetan alterasaun husi Dekretu-Lei n. 16/2024. PFN sai nu’udar kbiit ida hodi foti foin-sa’e sira ho idade tinan 12 to’o 17 husi postu administrativu 70 hodi partisipa iha dezenvolvimentu sosiú-ekonómiku.

Foku ba RAEOA, Bobonaro no Covalima

Atividade Estudu Vizita ba períodu dalima (2023-2026) nian sei hala’o iha liña fronteira, mak hanesan RAEOA, Munisípiu Bobonaro, no Covalima, hahú husi loron 22 to’o 27 Abríl 2026. Objetivu prinsipál husi vizita ne’e mak atu fó oportunidade ba membru PFN sira hodi identifika problema sosiál sira ne’ebé akontese iha fronteira, bazeia ba temátiku lima (5) iha PNJ: Saude, Edukasaun, Empregu, Empregabilidade, no Partisipasaun Sívika (Krime no Violénsia).

"Membru PFN sira sei ba iha komunidade hodi foti dadus no halo observasaun direita, inklui vizita ba postu seguransa PNTL-UPF no Migrasaun, hodi hatene servisu no dezafiu ne’ebé sira enfrenta iha fronteira," dehan Diretór Mário Tilman.

Dadus Partisipasaun no Finansiamentu

Ba implementasaun programa PFN nian iha tinan 2026, Governu aloka orsamentu hamutuk USD 96,899.00. Montante ne’e fahe ba Atividade Estudu Vizita (USD 41,824.50), Atividade Plenária (USD 45,004.50), no despeza operasionál ba ekipa organizadora (USD 10,070.00). Atividade ne’e organiza husi Alumni Parlamentu Foinsa’e Timor-Leste (APFTL) ho akompañamentu tékniku husi DNAJ.

Membru PFN ne’ebé rejista hamutuk na’in 142 (feto 71 no mane 71), ne’ebé reprezenta postu administrativu 70 iha territóriu tomak, inklui reprezentante husi Ema ho Defisiénsia (EHD). Maibé, ba atividade Estudu Vizita ne’e, membru hamutuk na’in 121 mak sei partisipa, tanba balun sai nu’udar bolseiru iha rai-li’ur no balun sei tuir ezame eskola nian.

Rekomendasaun ba Governu

Prezidente APFTL, Bemvinda G. Alves, subliña katak rezultadu husi estudu vizita ne’e sei lori mai Dili hodi akumula no halo workshop hodi valida dadus sira. Iha fulan Jullu oin mai, membru PFN sira sei aprezenta rezultadu hirak ne’e iha Plenária hodi hamosu rezolusaun no rekomendasaun ne’ebé sei entrega ba liña ministériu sira ne’ebé relevante hodi buka solusaun ba kestaun sira iha fronteira.

Atividade ne’e hetan apoiu másimu husi Autoridade Munisipál (PAM) no Autoridade Lokál sira iha liña fronteira, nune’e foin-sa’e sira bele halo interasaun direita ho komunidade no autoridade sira iha terrenu.