Dili, 02 Fevereiru 2026: Ministériu Juventude, Desportu, Arte no Kultura (MJDAK) liuhosi Diresaun-Jerál Arte, realiza rituál kulturál iha Kampu Korea-Timor Leste Friendship Sport Center, Becora. Rituál ne’e sosa dame no husu lisensa ba bei-ala sira antes inagurasaun boot aban.

Lia-na’in husi Suku Kamea, Domingos Soares ho André de Jesus, mak dirije hamulak ne’e. Sira husu lisensa ba matebian no "rai-na’in" husi foho sira ne’ebé hale’u Becora. Objetivu mak atu labarik sira ne’ebé treinu iha ne’ebá bele hetan kmaan no livre husi laran-todan ka moras.

Tuir lisan Timor nian, obra foun tenke simu uluk matak-malirin. Kampu ne’ebé harii husi Governu Koreia liuhosi ajénsia KOICA ne’e, prontu ona atu entrega ba MJDAK. Se la iha impedimentu, Primeiru-Ministru Kay Rala Xanana Gusmão hamutuk ho Prezidente KOICA mak sei korta fita iha loron aban.

Iha lorokraik ne’e mós, Ministru Nelyo Isaac Sarmento bá haree rasik preparasaun iha kampu laran. Ministru la’o hamutuk ho Diretora-Jerál Servisu Korporativu, Koordenadora GCI, Diretór-Jerál Arte, no ekipa tékniku sira seluk hodi garante katak buat hotu la’o loos tuir planu.