DILI, 19 Jullu 2025 – Iha loron 19 Jullu 2025, Timor-Leste marka istória hodi sai uma-na’in ba XII Jogos Desportivos CPLP (Komunidade País Lian Portugés). Eventu multidesportivu boot ne'e loke ofisiálmente ho ksolok no esperansa boot iha Estadiu Munisipál Díli.

Sua Exelénsia Primeiru-Ministru Interinu, Eng. Mariano Assanami Sabino, reprezenta Xefe Governu, Kay Rala Xanana Gusmão, hodi loke ofisiálmente Jogos ne'e.

Timor-Leste orgulhu simu Eventu Internasionál

Iha serimónia abertura, Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, hato’o diskursu Boas-Vindas hodi espresa Timor-Leste nia orgullu boot atu simu eventu ne'e ba dala uluk, hafoin adiamantu obriga husi pandemia.

Ministru Nelyo Sarmento destaka katak Jogos ne'e hanesan selebrasaun ida husi solidariedade, amizade no uniaun entre nasaun maun-alin sira. Nia subliña katak Desportu sai hanesan ponte ida entre kultura hotu no promove valór esensiál sira hanesan respeitu, fair play, espíritu ekipa, no kooperasaun.

"Ami fiar metin katak desportu hanesan ferramenta dezenvolvimentu nian, la’os de’it atu forma atleta, maibé mós atu kria ponte no inspira juventude," dehan Ministru Nelyo Isaac Sarmento.

Mensajen Unidade husi Primeiru-Ministru Interinu

Iha ninia intervensaun, PM Interinu Mariano Sabino subliña katak Jogos ne'e iha importánsia boot hodi:Unifika Juventude: Hametin ligasaun entre joven sira; Valoriza Diversidade Kulturál: Selebra rikeza kultura CPLP nian; Promove Dame no Kooperasaun: Desportu sai instrumentu ba unidade.

PM Interinu hato'o mensajen enkorajamentu ba atleta joven sira: "Hamnasa, kontente, halo jogu ho lealdade no hakmatek. Hamutuk ita hari'i futuru ida prosperu iha país CPLP."

Lema ofisiál ba Jogos ne’e mak "Unidos Nós Somos Um!", hodi hatudu duni espíritu fraternidade ne'ebé sei selebra iha Díli.

Ministru Nelyo Sarmento hato'o agradesimentu maka'as ba delegasaun husi nasaun maun-alin 7 no agradese ba Estrutura Interministeriál sira, Patrocinadór sira (Telkomcel, BNCTL, Leste Mineral Water, Timor Plaza, Timor Telecom), inklui mós apoiu lojístiku hosi maun-alin Angola.

#MídiaMJDAK