DILI, 11 Outobru 2025 – Ministériu Juventude, Desportu, Arte no Kultura (MJDAK), liuhosi Diresaun-Jerál Desportu (DGD), realiza ona Atividade Desportu Rekreativu nu'udar parte importante hodi harame eventu nasionál Dili International Marathon (DIM) 2025.

Inisiativa ne’e hala'o tuir orientasaun husi Sua Exelénsia Ministru MJDAK, Nelyo Isaac Sarmento, nu'udar Prezidente Komisaun Organizadora (KO) ba Dili International Marathon 2025.

Promove Saúde no Divertimentu ba Labarik Eskola

Atividade Desportu Rekreativu ne'e foka atu fó divertimentu no promove espíritu saudavél ba jerasaun foun. Partisipante sira husi atividade hirak ne'e mak estudante sira husi Eskola Ensino Básico iha Dili laran.

Atividade Desportu Rekreativu ne’ebé organiza inklui jogu tradisionál no dinámiku sira ne’ebé dada atensaun boot husi labarik sira:

• Han Krupuk: Jogu ne’ebé dada ema atu han uluk krupuk ne’ebé tara.
• Hasai Osan husi Jambua: Jogu ne’ebé presiza abilidade no pasiénsia.
• Tata Kanuru tau Berlindus: Jogu ne’ebé presiza konsentrasaun.
• Halai Karon (Sako): Jogu ne’ebé dada ema atu halai ho lalais no kontrola an.
• Jogo Bolão (Bola): Jogu ne’ebé kria animasaun.

Apoiu Desportu Komunitáriu

Atividade rekreasaun hanesan ne'e importante tebes atu hatudu katak Desportu la'ós de'it kompetisaun, maibé mós instrumentu atu hametin amizade no promosaun saúde komunitária.

MJDAK, liuhosi DGD, kontinua komprometidu atu fó espasu no oportunidade ba estudante sira hodi partisipa iha atividade desportu no rekreasaun ne'ebé kontribui ba sira-nia dezenvolvimentu fíziku no mentál.

#MídiaMJDAK