BAUCAU, 26 Agostu 2025 – Ministériu Juventude, Desportu, Arte no Kultura (MJDAK), liuhosi Diretór Nasionál Patrimóniu, Loístika no Infraestrutura (DNPLI), Sr. Abel de J. Andrade, ohin hala'o enkontru konjunta no inspesaun ba Estadiu Tadeu Lay-Kana, iha Munisípiu Baucau.

Enkontru ne'e lidera diretamente husi Diretór DNPLI no partisipa husi kompañia parseiru Guardamor Central Hill no Haypery Unipesoal Lda., inklui tékniku husi MJDAK no staff pontu fokal MJDAK ne'ebé destaka ona iha Baucau.

Avaliasaun Kontratu Seguransa no Manutensaun

Diretór DNPLI, Abel de J. Andrade, esplika katak objetivu husi enkontru ne'e mak atu avalia servisu seguransa, sanitáriu, no halo inspesaun ba manutensaun estadiu Baucau nian.

Bazeia ba rezultadu avaliasaun, Diretór husu urjentemente ba parte relevante sira atu kompleta sira-nia kontratu ne'ebé aseita ona ho parseiru sira: Seguransa (Guardamor): Presiza kompleta fardamentu, lanterna, paun de gás, no ekipamentu sira seluk tuir kontratu. Sanitáriu: Sei kompleta fardamentu ba pesoál sanitáriu no ekipamentu sira seluk ne'ebé inklui iha item kontratu nian.

Klarifikasaun Progresu Manutensaun

Diretór Abel de J. Andrade akresenta mós katak inspesaun ne'e atu haree diretamente progresu servisu husi kompañia Haypery Unipesoal Lda, ne'ebé halo manutensaun ba estadiu Tadeu Lay-Kana, atu bele konklui ona no prosesu pagamentu bele la'o ba oin.

Iha fatin hanesan, tékniku MJDAK, Sr. António Ximenes, realsa kona-ba nesesidade atu klarifika relatóriu servisu.

"Ami hakarak hatene se servisu ne'ebé sira halo tuir duni ka lae, tanba bazea ba relatóriu husi kompañia hateten servisu 100% ona. Ami presiza klarifika katak servisu ne'e tuir duni BoQ (Bill of Quantities) hodi nune'e bele halo ba prosesu pagamentu," nia hateten.

Asaun MJDAK nian ne'e hatudu kompromisu Governu nian atu garante kualidade infraestrutura desportiva no ezekusaun ne'ebé responsavel ba Orsamentu Jerál Estadu.

#MídiaMJDAK