DILI, 15 Abríl 2026 – Hafoin simu pareser husi Diresaun Nasionál Asosiativizmu Juventude (DNAJ), parte Konsellu Nasionál Juventude Timor-Leste (CNJTL) hala’o kedas sorumutu koordenasaun ho ekipa téknika MJDAK hodi halo ajustamentu ba programa no proposta fundus operasionál ba tinan 2026. Sorumutu ne’e konta ho partisipasaun husi Vise-Prezidente CNJTL, Clotilde Soares Guterres, Vise-Sekretáriu Ezekutivu, no Xefe Divizaun PAMA.

Aliñamentu ho PNJ no PANJ

Iha nota konfirmasaun ne’ebé hato’o husi Prezidente CNJTL, Maria D. S. Soares Magno subliña katak programa CNJTL nian foti baze legál husi Polítika Nasionál Juventude (PNJ) no Planu Asaun Nasionál Juventude (PANJ). Objetivu prinsipál mak hodi aumenta partisipasaun, inkluzaun, no kbiit lideransa foin-sa’e sira nian iha dezenvolvimentu nasionál liuhusi koñesimentu síviku, saudavél, no abilidade profisionál.

CNJTL mós asume kargu hodi monitoriza progresu PNJ nian no sei fornese relatóriu ba Konsellu Nasionál Dezenvolvimentu Juventude (KNDJ).

Rekomendasaun no Orsamentu

Maski rezultadu avaliasaun husi MJDAK propoin montante $25,443.00, Prezidente CNJTL husu ba MJDAK hodi konsidera nafatin montante $35,000.00. Balansu ho valór $9,557.00 ne’e, CNJTL planeia atu kontinua ezekuta atividade sira ne’ebé alinhadu ho temátika PNJ, ho targetu foku ba: Foin-sa’e sira ne’ebé la eskola (Out of school youth). No Foin-sa’e sira ne’ebé para eskola (Drop-out).

Aleinde ne’e, CNJTL husu mós ba MJDAK atu konsidera proposta ba kargu foun na’in sia (9), ne’ebé inklui Xefe Logístika ida (1) hodi hametin kbiit administrativu iha instituisaun laran.

Harmonizasaun ToR ba Mini Kongresu

Nu’udar pasu hodi rezolve inkonsisténsia ne’ebé identifika ona, CNJTL kompromete hodi harmoniza fali Termu de Referénsia (ToR) ba atividade Mini Kongresu iha Munisípiu. Ida-ne’e iha objetivu ba asegura katak atividade hotu la’o tuir padraun tékniku ne’ebé MJDAK ezije, nune’e bele hakat ba faze implementasaun nian ho transparénsia no akontabilidade.

Diskusaun ne’e hatudu progresu pozitivu entre MJDAK nu’udar entidade tutela no CNJTL nu’udar parseiru estratéjiku hodi dudu kualidade governasaun iha setór juventude.

#MídiaMJDAK