RAEOA, 12 Setembru 2025 – Ministériu Juventude, Desportu, Arte no Kultura (MJDAK), liuhusi Diretór-Jerál Juventude (DJJ), David Tomás De Deus, hamutuk ho Sentru Juventude Rejiaun Oé-Cusse (CJRO), realiza ona formasaun edukasaun kona-ba Relasaun Saudavel ba joven na'in-ruanulu-resin-neen (26) iha Suku Lela-Ufe, Postu Administrativu Nitibe.

Formasaun ne'e hala'o durante loron lima (8 to'o 12 Setembru), ho objetivu atu kapasita joven sira no hasa'e sira-nia koñesimentu kona-ba saúde reprodutiva. Inisiativa ne'e nu'udar esforsu atu prevene problema sosiál hanesan kazamentu sedu, isin-rua sedu, no moras hada'et liuhusi relasaun seksuál.

Partisipante sira iha formasaun ne'e inklui estudante no profesór voluntáriu sira husi Eskola Sekundária Jerál Haubeno. Sira simu matéria kompletu kona-ba biolojia, siénsia sosiál, no edukasaun sivika.

Joven sira mak Futuru Nasaun nian, Presiza Saudavel

Iha serimónia enseramentu, Diretór-Jerál David Tomás de Deus hato'o agradesimentu ba CJRO no autoridade lokál sira tanba kolaborasaun ne'ebé di'ak. Nia subliña katak joven sira presiza koñesimentu báziku kona-ba sira-nia an rasik atu bele respeitu sira-nia an no ema seluk.

Diretór-Jerál David Tomás de Deus afirma katak programa formasaun hanesan ne'e nu'udar investimentu Governu nian ba futuru.

"Joven sira mak futuru nasaun nian, no atu hetan futuru ne'ebé di'ak, joven sira tenke saudavel no tenke iha relasaun ne'ebé saudavel," nia hatutan.

Nia fó hanoin mós ba partisipante sira atu fahe informasaun ne'ebé sira simu ba sira-nia maluk joven sira seluk ne'ebé la hetan oportunidade atu tuir formasaun ne'e.

Kompromisu Kontínuu ba Dezenvolvimentu Juventude

Iha entrevista separada, Diretór CJRO, Deonízio Taek, hateten katak objetivu prinsipál husi formasaun ne'e maka atu muda karáter joven sira hodi minimiza kazu kazamentu sedu no isin-rua sedu iha Rejiaun Oé-Cusse.

Diretór Deonízio Taek mós informa katak orsamentu ba formasaun ne'e, ho totál $3,100, mai husi MJDAK. Nia afirma katak CJRO iha kompromisu atu kontinua realiza formasaun hanesan ne'e iha suku no postu administrativu seluk iha teritóriu Oé-Cusse nian, no hatán mós ba pedidu husi komunidade sira atu lori formasaun ne'e tama ba eskola sira.

#MídiaMJDAK