BAUCAU, 20 Abríl 2026 (GCI/MJDAC) – Sekretaria Estadu Arte no Kultura (SEAK), reprezenta husi Xefe Departamentu Istória no Valór Kulturais, Carlos de Jesus Freitas, partisipa iha Misa Agradesimentu hodi komemora Loron Fundasaun Baucau ba dala-167. Serimónia ne’ebé hala’o iha Parókia Katedrál Baucau, sesta-feira ne’e, sai nu’udar parte importante hodi fó onra ba istória no dezenvolvimentu sidade nian.

Sorumutu espirituál ne’e hetan mós partisipasaun husi Prezidente Autoridade Munisípiu (PAM) Baucau, Veneranda Lemos Martins, no Prezidente Kamâra Komérsiu no Indústria Timor-Leste (CCI-TL) Munisipiu Baucau, José Januário Reis. Misa ne’e prezide husi Amu Vigáriu Salesianu, Adérito E. Vítor.

Apelu ba Responsabilidade no Unidade

Iha homilia, Amu Adérito Vítor kria reflexaun kle’an hodi husu ba autoridade sira atu hala’o sira-nia funsaun ho responsabilidade aas. Amu selebrante ne’e fó hanoin katak dezenvolvimentu iha Baucau bele la’o ba oin de’it se ema hotu, inklui Uma-Kreda no Governu, hamutuk hodi hadi’a fallansu sira ne’ebé iha.

"Nai haraik bensaun ba ita-nia autoridade sira hodi bele ezerse sira-nia funsaun ho di’ak no responsabilidade profundu. Ema hotu tenke kontinua kontribui hodi lori Baucau ba oin. Ita tenke orgullu hodi hadi’a fallansu sira liuhusi unidade hodi garante dame no estabilidade," dehan Amu Adérito.

Marsa Komboiu no Atividade Diversaun

Hafoin ramata misa, PAM Baucau hamutuk ho sarani sira hala’o marsa komboiu husi Vila Antiga ba Edifísiu Prezidente Autoridade Munisipál. Iha fatin ne’ebá, komunidade sira festeja ho atividade oioin ne’ebé anima sidade tomak, hanesan kompetisaun Free Style motor, dansa tradisionál, múzika, no drama.

Alende diversu, komemorasaun ne’e mós inklui atividade solidariedade hanesan doasaun raan hodi ajuda sira ne’ebé presiza. Atividade hirak ne’e sai nu’udar meiu ida hodi hametin relasaun entre komunidade no autoridade sira.

Partisipasaun Másimu

Selebrasaun ne’e hetan partisipasaun husi sarani no komunidade Baucau, inklui mós forsa seguransa husi PNTL no F-FDTL. Marka prezensa mós Autoridade Administrasaun Postu (AAP) husi postu ualu iha Munisípiu Baucau, profesór, estudante, no inan-aman sira ne’ebé haksolok hodi hametin identidade sidade nian.