DILI, 31 MARSU 2026 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, partisipa iha reuniaun koordenasaun nível altu dahuluk ne’ebé lidera husi Vise-Primeiru-Ministru (VPM), Ministru Koordenadór ba Asuntu Ekonómiku no Ministru Turizmu no Ambiente, Sua Exelénsia Francisco Kalbuadi Lay, hamutuk ho Xefe Casa Civíl (CCC) Prezidénsia Repúblika, Sra. Henriqueta da Silva.

Enkontru ne’ebé hala’o iha Palásiu Prezidensiál, Aitarak-Laran ne’e, ho objetivu hodi halo preparasaun másimu ba realizasaun eventu nasionál boot tolu ne’ebé planeia sei hala’o iha loron 8 Agostu tinan 2026.

Eventu estratéjiku tolu ne’ebé sai foku iha diskusaun ne’e mak: Dili International Marathon; Programa Siénsia ba Dezenvolvimentu; no Selebrasaun Natal ho Povu.

Iha sesaun ne’e, Vise-PM Francisco Kalbuadi Lay, nudar Prezidente Komisaun Organizadora, subliña katak Governu hakarak tinan 2026 sai hanesan ezemplu di’ak ba organizasaun eventu nasionál ne’ebé iha projesaun internasionál. Nia mós enfatiza katak estabilidade nasionál no unidade mak sai xave fundamentál ba susesu inisiativa hirak ne’e.

“Eventu sira ne’e importante tebes tanba bele atrai investimentu estranjeiru, dinamiza ekonomia lokál, no kontribui ba redusaun dezempregu. Estabilidade nasionál mak kondisaun prinsipál atu garante susesu ba inisiativa sira-ne’e,” dehan Vise-PM.

Vise-PM mós fó rekoñesimentu ba papél lideransa Sua Exelénsia Prezidente Repúblika, José Ramos-Horta, iha konsolidasaun unidade nasionál, liuliu konsiderea katak tinan 2026 marka faze finál mandatu prezidensiál ne’ebé iha valór simbóliku boot ba nasaun.

Reuniaun ne’e mós sai fatin hodi konfirma estrutura organizasaun, hametin koordenasaun institusionál, no estabelese liña relatóriu ne’ebé klaru entre entidade governamentál sira ne’ebé involve iha implementasaun atividade refere.

Iha biban ne’e, Vise-PM konvida ministériu no instituisaun hotu, inklui MJDAK, hodi serbisu hamutuk nudar ekipa ida de'it (One Team) hodi asegura katak preparasaun no ezekusaun eventu sira-ne’e la’o ho susesu no atinji rezultadu ne’ebé kmanek.

#MídiaMJDAK