MAUBISSE, 23 Setembru 2025 — Sekretáriu Estadu Arte no Kultura (SEAK), liuhosi Xefe Gabinete SEAK, Francisco Tae Mau, inagura ona uma lisan istóriku Fadtuto Leheintuto iha Postu Administrativu Maubisse, Munisípiu Ainaro.

Responsabilidade Moral no Konstitusionál

Iha ninia intervensaun, Xefe Gabinete Francisco Tae Mau hateten katak inagurasaun ne'e merese atu hetan apoiu husi SEAK tanba Ministériu iha responsabilidade moral atu fó apoiu ba jerasaun sira ne'ebé hakarak prezerva no konserva sira-nia uma lisan no kultura.

Nia subliña katak artigu 59, aliñe A no F husi Konstituisaun RDTL fó direitu ba sidadaun hotu atu konserva no prezerva sira-nia uma lisan tuir orijinalidade ne'ebé bei'ala sira husik hela.

Francisco Tae Mau hato'o parabéns boot ba liurai no jerasaun Fadtuto Leheintuto nian tanba sira-nia konsiénsia no vontade rasik atu prezerva no konserva sira-nia sasán lulik tuir materia prima orijinál.

Istória no Orijinalidade Uma Lisan

Uma lisan Fadtuto Leheintuto ne'e hatudu rezisténsia istóriku. Uma ne'e sunu iha períodu 1975 to'o 1999, maibé hahú harii hikas iha tinan 2002 no inagura uluk iha tinan 2008.

Atu garante valór kulturál, uma lisan ne'e, ne'ebé kompostu husi xefe família 43, harii tuir orijinalidade ne'ebé bei'ala husik hela, la modernizadu tuir vontade ema nian.

Apelu ba Apoiu Kontinua

Lia-na'in husi uma lisan Fadtuto Leheintuto, Américo Pereira, husu ba Governu, liuhosi SEAK, atu kontinua fó apoia finanseiru hodi kompleta item sira ne'ebé seidauk hotu. Iha prosesu harii fali uma lisan ne'e, família uma lisan kontribui ho montante $400, no Governu, liuhosi SEAK, apoia ho montante $2,000.

Inagurasaun ne'e partisipa ho másimu husi família uma lisan Fadtuto Leheintuto tomak, hodi selebra hamutuk sira-nia kultura no identidade.

#MídiaMJDAK