DILI, 6 Jullu 2026 – Ministériu Juventude, Desportu, Arte no Kultura (MJDAK), liu husi Diresaun Jerál Servisu Korporativu hamutuk ho Diresaun Nasional Arte Kultura (SEAK), hato'o últimu homenajen ba falesimentu Padre João V.B. Felgueiras, SJ, ne'ebé realiza iha serimónia funerál loron Segunda-feira, 6 Jullu 2026.

Padre João V.B. Felgueiras, SJ, nudar figura espiritual no intelektual ne'ebé kontribui boot ba dezenvolvimentu edukasaun no kultura iha Timor-Leste. Nia dedikasaun ba servisu fiar no kompromisu ba nasaun ne'e sai hanesan inspirasaun ba komunidade tomak durante nia moris.

Funsionáriu sira husi MJDAK-SEAK partisipa ho laran luto atu hato'o omenajen ikus ne'e ba almarhum Padre João V.B. Felgueiras, SJ. Partisipasaun ida ne'e hanesan sinál respeitu no rekoñesimentu boot ba kontribuisaun ne'ebé almarhum fó ba dezenvolvimentu edukasaun no kultura iha Timor-Leste.

MJDAK-SEAK mós hato'o sentimentu kondolénsia profundu ba família, amigos, no kongregasaun Jesuita sira. "Deskansa iha paz, Padre. Ita-nia kontribuisaun no dedikasaun ba rai Timor-Leste sei sempre hamatan no tau iha kurason hotu," hateten deklarasaun ofisiál husi MJDAK-SEAK.

Padre João V.B. Felgueiras, SJ, koñesidu liu ba nia papel iha área edukasaun, liuliu iha formasaun juventude no dezenvolvimentu kultura timoroan. Nia servisu ne'ebé kontinua no dedikadu sai referénsia ba jerasaun sira iha Timor-Leste.

Homenajen ne'e mós hanesan momentu reflesaun ba ema hotu atu kontinua defendé no dezenvolve kultura no edukasaun iha nasaun ne'e, tuir dalan ne'ebé almarhum Padre João V.B. Felgueiras, SJ, hahú no kontinua durante nia moris.

MJDAK-SEAK reafirma kompromisu atu kontinua servisu iha área arte no kultura nu'udar parte husi legadu almarhum, atu asegura katak kultura timoroan kontinua moris, dezenvolve, no sai inspirasaun ba jerasaun oin mai.

#MediaMjdak