DILI, 30 MARSU 2026 – Ministériu Juventude, Desportu, Arte no Kultura (MJDAK) kontinua halo diskusaun naruk hodi elabora no re-define prioridade estratéjiku ba Planu Médiu Prazu (PMP) 2027-2030. Surumutu ne'e lidera husi Diretór Jerál Juventude no Diretór Jerál Servisu Korporativu Interinu, Sr. David Tomas de Deus, hamutuk ho Diretór Jerál Desportu, Sr. João M. Rodrigues, no Diretór Jerál Arte no Kultura, Sr. Gil Paulino de Oliveira.

Partisipa mós iha diskusaun ne'e Xefe Gabinete MJDAK, Sr. Egas Baros Guteres Godinho, hamutuk ho dirijente sira no asesór sira, hodi foka ba identifikasaun kestaun prinsipál (Key Issues) ne'ebé liga ho soft skills no inkluzaun sosiál.

Mandatu Rezolusaun Governu n.º 43/2024

Diskusaun ne’e bazeia ba orientasaun husi Nonu Governu Konstitusionál liuhusi Ministériu Planeamentu no Investimentu Estratéjiku (MPIE) atu re-define prioridade sira iha tinan lima oin mai. Rezolusaun Governu n.º 43/2024 fó instrusaun ba liñas ministériu hotu, liuliu MJDAK ne'ebé asume knaar iha Setór Kapitál Sosiál, hodi identifika dezafiu foin-sa’e no desportu nian ne’ebé seidauk atinji dezde tinan 2012-2024.

“Ita diskute formatu ne’e atu bele atinji tuir tarjetu ne’ebé bazeia ba deadline. Importante mak oinsá ita re-define ita-nia planu prioridade sira iha sub-setór Inkluzaun Sosiál (Juventude no Desportu) no Kultura Patrimóniu,” dehan David Tomas de Deus.

Identifikasaun Kestaun no Intervensaun Estratéjiku

Bazeia ba dadus tékniku MJDAK nian, diskusaun ohin identifika katak kapasidade institusionál organizasaun desportiva sira-nian ne'ebé limitadu sai kestaun prinsipál ne'ebé presiza hetan atensaun urjente. Atu responde ba ida-ne'e, MJDAK planeia intervensaun sira hanesan:

·       Dezenvolvimentu Soft Skills: Foka ba formasaun kbiit kreativu juventude nian no profisionalizmu rekursu umanu desportivu.

·       Fortalesimentu Institusionál: Reforsa kbiit klube no federasaun sira hodi jere dezenvolvimentu desportu ho efikás.

Meta SMART no Verifikasaun (MoV)

MJDAK kometidu hodi preenxe formatu PMP ne'ebé bazeia ba meta SMART (Specific, Measurable, Achievable, Relevant, Time-bound). Ida-ne'e inklui foti dadus Baseline tinan 2026 hodi sukat ba Target tinan 2030, ho Meius Verifikasaun (MoV) ne'ebé fiksa liuhusi Relatóriu Anuál no sistema SIOD.

Urzénsia husi elaborasaun PMP ne'e liga mós ho preparasaun ba Orsamentu Jerál Estadu (OJE) iha futuru, hodi asegura katak setór Kapitál Sosiál hetan finansiamentu ne'ebé sufisiente ba dezenvolvimentu foin-sa'e no kultura iha Timor-Leste.

#MídiaMJDAK